誤判｜甄子丹片場狂爆粗片流出　兩位大哥客串一樣執到正

由甄子丹主演及執導的律政電影《誤判》，正在上畫。電影早前在網上發佈一條長達50多分鐘的製作特輯，有別過往的花絮片段，今次是無遮無掩的全紀錄，展現一眾演員最真一面。而表現最真的相信是甄子丹本人，全片有不少爆粗畫面，不單會責罵一班劇組手足，甚至兩位客串的大哥呂良偉同鄭浩南都慘被質。到底電影公司點解會發佈一條表現咁真嘅影片，背後原因又係咩？

連環爆粗幕幕黑面

在這條製作特輯中，可以話見到甄子丹最真性情一面，將他在片場上認真的態度，火爆的性格表露無遺。其中最易觸動甄子丹的，是製作流程緩慢︰「而家三點喇（凌晨），唔該你哋快啲呀，唔係今日拍唔晒你哋就大X鑊！」、「如果我話再嚟，就唔使再睇Play Back，因為你而家係嘥緊好多時間」、「將啲咁簡單嘅嘢，又複雜佢，講幾廿萬次又要排過晒！」幕幕都黑口黑面，場面僵持。

另一爆得最多粗口係甄子丹跟吳鎮宇對戲，呢場戲目的係要激起戲中吳鎮宇團火，但因為劇本張力未夠，於是二人在場即度即試，結果度出一場吳鎮宇挑戰「葉問」。「最好睇就係吳鎮宇突然走埋嚟，X你老X，你好X好打呀？隻揪！然後佢係對緊甄子丹，觀眾睇到會笑。」

呂良偉鄭浩南都冇面畀

除了劇組人員，客串的演員都受到甄生的高壓挑戰，例如有一場有呂良偉與鄭浩南客串，但因為二人演出未夠出彩，冇為角色帶來驚喜，甄生都不禁動氣︰「究竟呂哥今次會點演，客串一日兩日咁短，畀觀眾有啲驚喜吖 ！你都係（指向鄭浩南）點樣可以畀觀眾驚喜，我唔想大家嚟到好似……雖然係幫手，我唔想大家嚟到圍威喂咁，我搵你哋嚟，係希望你哋出彩！」雖然呂哥與子丹份屬老友，但在片場上一樣無面畀。

希望大家珍惜機會

藝人向來要贊形像，但點解官方會推出呢條製作特輯呢？片中有一段甄子丹跟劇組人員訓話，憶述自己由3000蚊月薪捱到今時今日，當中充滿好多機會畀大家去實習，但眼前所見香港電影已經沒落，冇乜機會再拍大製作，所以希望劇組所有人珍惜。甄子丹︰「其實而家甄生已經唔多理，我已經收X晒火，因為年紀大，我都唔係好想X人，因為自己都傷身……香港電影已經沒落，後繼無人，好難得有部大製作畀大家實習，畀機會去試，我們好嬲大家冇去珍惜。」

睇到最後，更見甄生在煞科當晚的一番對話，大家聽埋會有所領會。甄子丹︰「我知道喺我嚴厲的催促下已經好辛苦，心裡好可能日日鬧緊我……以後你會諗番起，甄生X你老X，咁X仆街，日日喺度鬧我，但我都希望喺有啲唔好嘅回憶，都諗番起，原來當初甄生都係想大家好，我相信呢部戲之後，大家都會提升咗一啲諗法或者創作空間。」