亞洲電影大獎｜劉青雲《爸爸》封帝　台上安慰仔女︰你好叻

《第18屆亞洲電影大獎》今晚舉行，「最佳男主角」由劉青雲憑電影《爸爸》奪得，榮膺亞洲影帝，這也是他的首座亞洲「最佳男主角」。劉青雲發表感言時，第一句就表示：「好開心《爸爸》係港產片！」

劉青雲憑電影《爸爸》奪得《第18屆亞洲電影大獎》的「最佳男主角」。（影片截圖）

劉青雲在今晚舉行的《第18屆亞洲電影大獎》中，憑港產片《爸爸》擊敗許冠文、長塚京三、崔岷植及彭于晏幾位強敵，贏得「最佳男主角」。劉青雲從今屆「終生成就獎」得獎者，日本演員役所廣司先生手上攞過亞洲影帝獎座。

劉青雲︰「我好開心《爸爸》係港產片，我好多謝導演翁子光一直對我嘅信任，同埋畀咗呢個機會我。我要好多謝我戲裡面嘅屋企人，包括谷祖琳，飾演我個女嘅Lainey（熊諾頤），雖然你無提名過，但其實爸爸覺得你做得好好。仲有我戲裡面個仔蘇文濤，佢有提名最佳新人，雖然佢無攞獎，但唔緊要，你知唔知，我從來無提名過最佳新人，所以其實你好叻㗎。多謝大家，我對港產片係有信心嘅，大家一齊努力！」