忍無可忍好想quit？ 給我3個「裸辭」的理由
諸事不順，剛剛才被老細「照肺」，回頭又見「Hea爆」同事漫遊Youtube。你勤力，你認真，你對工作十分上心，但歷經多年煎熬後，腦海中只能閃過一句「完了吧，如無意外！」
有人力顧問公司早前發表報告，發現逾半受訪者在職場感到委屈後，會嘗試適應或啞忍，但亦有將近4成受訪者選擇辭職了事。
然而，問題是休息一個月可以，但一個月後怎樣找工作？承受了多大的委屈才值得犯這麼大的險？《香港01》綜合了獵頭女皇Son姐及盈力僱員服務顧問首席顧問孫立民的意見，整理出3道問題，好讓你出走之前先來把脈。
問題一︰「因人事關係辭職，值得嗎？」
Son姐接受訪問時笑道，99%打工仔辭職理由都離不開人事問題，假若你是當中一份子，絕對是「You’ll never walk alone」。之不過，人人如此卻不等於這種處理方法恰當，根本問題含糊不清，裸辭復工後恐怕只會重蹈覆轍。
「為了其他人而辭職，值得嗎？這一點很難說得清，但有一點是不會變的——不止屋企人無得揀，其實同事都係無得揀的。你入嚟在先，個死八婆入嚟在後，或者掉轉，整個過程你可以點干預？所以，通常忍唔到人際關係而辭職的人，往後再中招的機會係非常大。可以的話，不如嘗試跟上司申請調組或者攤出嚟傾。都係唔得，一定要走，都拜託你好好反思一下自己的問題，唔通成世都一走了之咩？」Son姐稱。
問題二︰「老闆語氣差，但真的毫無道理嗎？」
打工仔總是希望老闆律己以嚴，待人以寬，但換個角度睇，老闆又何嘗不是打着同一算盤？同理，孫立民認為若然打工仔裸辭，是因為受夠了老闆的無理責罵或要求的話，就最好先冷靜下來抽離情緒。
「試過有個個案係關於一位年青教師，因為校方慣例，校長每年都要為所有老師觀課一次，結果呢位老師戰戰競競咁準備多時，但最後校長竟然觀了兩次課。事後校長解釋，話呢位老師表現不太理想，所以要再一次觀課評價成效，結果呢位老師覺得自己被冒犯了，認為自己被針對，校長處事不公平云云，最後毅然拍檯就走。」
孫立民嘆道，「『委屈』的感覺是主觀的，難免會有小題大做的時候。如果你了解自己是個EQ較低的人，最好在動怒裸辭之前為自己降一降溫，嘗試把對話中的意見及態度暫時割裂開去，或許你會發現，原來對方的要求是非常合理的。」
問題三︰「觸及原則問題，可以理直氣壯地走了嗎？」
什麼是原則問題？你的原則不等於我的原則，每個人心中都有一把獨一無二的尺。正因如此，假若打工仔因為良心過意不去，或覺得做人原則備受侵犯而想一走了之的話，中間可能錯過了解決問題的機會。
Son姐以過來人身份解釋，「有位朋友的Boss一向口賤，經常會以粗口辱罵下屬，大庭廣眾辱駡人家父母。頂佢唔順決定離職都係一個好選擇，但下呢個決定之前，我叫呢位朋友試下惡啲對佢老細講︰『你X邊個都得，就係唔可以X我！』結果呢個老闆對住佢時真係收歛咗，一份好好嘅工作亦因此保住咗。」
Son姐一再強調，現時已經不再是人浮於事，一職難求的年代。每個人的底線都不應該因為工作而無限往後推，必要時離職比啞忍是更好的選擇。「無一份工係值得你放棄自己的原則。」Son姐稱，「大部分人都是欺善怕惡的，你不出聲就會不斷被欺壓。打工仔最緊要知道自己的位置，要記得自己永遠都有選擇。」
制度奠定不公平規則 裸辭代價高昂
最後，孫立民特別提醒打工仔，由於香港企業的人事部門態度傾向保守，通常會把在裸辭或人際關係離職個案看待成「搞事份子」，成本極高。「當然你可以作個理由解釋點解離職，不過，如果呢間係稍具規模的公司，通常都會打去上一間公司cross check返離職記錄，到時你真係會百辭莫辯！」
因此凡事最好先以協商方式解決，主動釋出善意，到真的無法解決之時，亦宜與上司保持較好關係離職，切忌為了當「一分鐘英雄，卻令自己後患無窮。」孫立民如此道。