【溫多娜手記】曾俊華拍宣傳片　扮《金雞2》華仔冀港人有得揀

前財政司司長曾俊華「退而不休」，除咗加入多間金融科技公司做顧問，亦不時於網上發功抽水。近日「薯片叔」為虛擬保險公司Bowtie（保泰人壽）拍攝宣傳片，就大玩電影《金雞2》經典場面，仲寄語香港人要「有得揀」！

穿越至2047稱香港人仍「無得揀」

短片入面，呢位「華仔」學足喺《金雞2》飾演2047年特首嘅劉德華，但就笑笑口話「我唔係特首」，又提到雖然嚟到2047年，香港人好多嘢仍然無得揀，但至少買保險就有得話事，希望每個香港人都可以擁有一份保障。

落足咀頭Sell保險，原來因為「薯片叔」早於4月就加入Bowtie出任資深顧問，一直為呢間保險公司出謀獻策。佢喺新聞稿提到，香港人雖然於眾多事情上尚未有選擇嘅權利，但希望以行動啟發並推動創科發展，用最基本嘅方法改善社會民生，未來會與Bowtie緊密合作，透過推廣活動加深港人對保險嘅認知，希望減輕香港公營醫療壓力。

Bowtie聯合創辦人兼聯合行政總裁顏耀輝就話，希望透過網上科技，令港人可以自行投保及掌握自主權，為香港大眾打開全港私家醫院大門。