【溫多娜手記】宏利CEO拎起結他變Band友　大唱Rock版聖誕歌

距離聖誕節尚有約莫1星期，正當打工仔密鑼緊鼓準備禮物及籌備假期節目，各大企業高層亦都忙到「甩轆」，除了趕於年底前完成手頭工作，更要於大時大節之際慰勞員工。宏利香港CEO萬士家（Guy Mills），近日就化身「Band友」兼夾大開金口，向一班伙記送上聖誕祝福。

Band友扮相入型入格

最近宏利香港首席行政總監萬士家親身上陣，同一眾公司高層拍攝短片，片段中萬士家身穿黑色皮褸，又拎起電結他，仲走入錄音室大唱聖誕歌，望落真係有幾分「Band友」風範。佢仲話，今年宏利業績相當靚仔，難怪要扮鬼扮馬嚟感謝一班同事啦！

話說宏利呢位CEO向來中意「整蠱做怪」，舊年聖誕節前就扮過魔術師，識得將麵粉棍一碌碌出Pizza、用法術榨橙汁等等，今年10月又試過着起粉紅色西裝做「粉紅救兵」，力撑香港癌症基金會嘅「粉紅服飾日」，唔知出年又會有咩搞作呢？