【普教中粵教中】我們都是用廣東話學中文長大的│Sci Papa
幾年前，筆者上廣州探親戚，喺「和諧」號上偏偏看到令人覺得十分不和諧嘅一幕；一個媽媽用廣東話鬧緊個仔——「你個衰仔，叫咗你早啲出門口，正一陀衰家！」，然後個仔又鬧返佢啊媽——「他媽的，你這個臭婆娘，那裏像一個媽媽！」奇怪嘅係個仔用嘅係普通話⋯
唔通佢哋唔係兩母子？！又或者佢阿爸係講普通話嘅？！
見到親戚後，筆者發現呢個情況其實喺廣州都幾普遍。筆者自己嗰一輩用廣東話交談，細嗰一輩卻愛用上普通話。一家人出生於同一個城市，住喺同一個屋苑，坐喺同一張飯桌，卻用上兩種唔同嘅語言；呢種距離感，原來係因為唔少廣州幼稚園同小學已用上普通話教學，小孩子就慣性使用普通話。
當時，筆者不以為然，但睇嚟自己最親嘅人慣性講同自己唔同嘅語言，未必離香港好遠！老實講，對學習其他語言，筆者絕對十分支持，但對於放棄用自己嘅母語而改用其他語言代替來教學，實在不能認同，就算只係從學中文開始。
喺呢個世界，其實有唔少少數族裔生活喺大城市，都希望城市可以用上佢哋嘅母語為下一代提供教育。主要原因係唔少研究都發現，用母語教學可以令小孩嘅學習事半功倍！母語令人與人之間有更好嘅溝通，令小孩喺學習上能更有自信，從而有較高嘅學習效率（https://www.ajol.info/index.php/pelj/article/view/156258）！甚至有研究發現用母語教學，令小孩嘅語言同數理學習同有優勢（https://www.tandfonline.com/doi/abs/10.1080/14790718.2017.1359275）！
呢啲研究結果其實並唔出奇，用返自己最熟悉嘅語言，學起嘢上嚟梗係容易啲！雖然BBC報導中嘅一個統計指出，喺香港講普通話嘅人數由1996年只有25%上升至2016年差不多有一半（49%），但講廣東話嘅人仍然係大多數，喺2006同2016年仍有差唔多95%人講廣東話（https://www.bbc.com/news/world-asia-china-40406429），試問少數族裔都期望有嘅母語教學，點解喺差唔多人人都講廣東話嘅香港要背道而馳，用普通話教中文？
再者，同一篇BBC新聞更指出，廣東話比普通話有更長嘅歷史記載，廣東話喺漢朝時已有記載，但到元朝時先至有有關普通話嘅文獻證據；令人不禁問推銷普教中，係無私嘅單單為了香港未來嘅主人翁加強競爭力，定係主管香港教育嘅楊姓男子自私嘅一個政治任務？
筆者呢一輩人，唔單至冇普教中，甚至連普通話都唔駛學，咪又係一樣可以閱讀中文，可以寫下中文文章，有唔少同輩仲可以喺中國講普通話嘅城市做得風山水起；我哋都係用廣東話學中文長大，我哋嘅中文真係咁不濟，以致我哋失去優勢嗎？
Sci Papa （專頁：Scientific Papa）
喜歡科學，但更喜歡老婆跟女兒。覺得科研跟「湊女」都是要有極度的耐性，不怕失敗，還要懂得自我反思後用不同方法再嘗試！將育兒及科學融合，期望伴著女兒走一條快樂的成長路。