【睡前故事】龜兔賽跑原來系只豬贏咗？！│Sci Papa

話說筆者每晚都會喺大女兒瞓覺之前講故事，但系講邊一個故事，通常都繫個女話事，當然筆者有時都會反抗。不過，當面對佢最鐘意嘅《龜兔賽跑》同《三隻小豬》呢兩個故事，筆者真系講到「口臭」！上星期有一晚，女兒臨瞓前又叫筆者講《龜兔賽跑》⋯⋯科豆：「前晚先講《龜兔賽跑》咋喎，又講？」女兒：「咁講《三隻小豬》啦！」科豆：「咪上星期五晚講咗囉！」女兒：「咁講《龜兔賽跑》啦！」睇嚟筆者都難逃一劫，又要講一次呢兩個故事，但向來唔喜歡沉悶，筆者只好發揮創意，將《龜兔賽跑》同《三隻小豬》呢兩個故事cross-over！

《龜兔賽跑》講到兔仔驕傲嗰一節：「兔仔原來冇瞓覺，去咗同三隻小豬嘅豬大哥玩喎，跟住佢同豬大哥及豬二哥一齊逃避大灰狼嘅追補。當佢哋走到去豬三弟嘅屋企時，就遇到跑跑下迷左路嘅烏龜，於是佢哋一齊入咗豬三弟嘅屋企，然後大灰狼黎到，當然系吹唔爛間屋啦！於是佢哋喺屋企度，等到大灰狼走咗，然後就決定一行五隻動物一齊賽跑，最後兔仔為咗等埋烏龜呢個朋友，於是個比賽就被好勤力嘅豬三弟贏咗啦！」

嗰一晚，個女聽完呢個咁有創意嘅故事，當然好滿足咁樣瞓咗覺啦；呢件事，亦令到筆者決心將唔同嘅故事cross over，例如將《金銀鐵斧頭》同《狼來了》cross over咗，《城市老鼠和鄉下老鼠》就同《鳥、獸和蝙蝠》cross over！

甚至有時，筆者亦會畀女兒參與創作，究竟故事點發展，筆者都會畀佢作選擇。例如《醜小鴨》只天鵝仔最後揾唔返媽咪，去咗雞仔屋企住，但後來女兒又想天鵝仔有父母錫，又安排父母去雞家揾到佢；原來，女兒十分重視父母嘅愛。《吃不到的葡萄是酸的》只狐狸又食唔到葡萄，反而去咗開水果派對，然後食咗佢最鐘意食嘅火龍果。原來女兒最鐘意有不同水果任佢選擇。

每晚同女兒一齊創作故事系一個十分唔錯嘅親子活動，更重要系喺創作過程中，筆者可以了解女兒唔同嘅想法，有時仲可以問嚇佢點解想個故事咁樣發展，從而畀佢作更多嘅分享！加上佢可以參與故事創作，更能投入同專注故事發展！

筆者著實好鐘意呢個活動，如果女兒唔嫌棄嘅話，筆者希望可以為女兒每晚都講一個故事，如果要為呢個親子活動定一個限期，筆者希望系「一萬年」；可是，筆者卻又知道，佢仲會嘈住叫爸爸講故事嘅時間已經唔多，可以做嘅就只有珍惜當下。

Sci Papa （專頁：Scientific Papa）

喜歡科學，但更喜歡老婆跟女兒。覺得科研跟「湊女」都是要有極度的耐性，不怕失敗，還要懂得自我反思後用不同方法再嘗試！將育兒及科學融合，期望伴著女兒走一條快樂的成長路。