【中環●手作市集】買文青豬肉佬圍裙　再睇和服改裝背囊

萬聖節過去，聖誕節就不遠了。黎到11月，開始張羅聖誕節禮物絕對唔會太早，事關到時你會唔記得……求奇之下難免買到水杯、筆記簿、書呢三寶，咁就好醜怪啦。

南豐呢個「好匠店坊」市集相當有特色，一般我哋講到「消費」可能就會不期然連繫到「浪費」，不過市集有一系列「升級再造」產品，唔同檔主各施其法，將各種二手原料「升級再造」成為特色新產品，例如有果仁殼變首飾、二手和服改成型格背囊、回收物料樣辦拼貼成床套套裝、將工廠剩餘的羊毛布碎創作飾物等等，製品精美又環保。

不單如此，禮物需要包裝，包裝卻係浪費，點解決呢個矛盾呢？市集特登收集唔同工廠嘅剩餘布料，成為專用禮品包裝。布料本身精美新淨，如今用得其所，大家亦有靚靚包裝。

除此之外，特別介紹「香車製造」圍裙，係六廠基金會與香港紡織及成衣研發中心共同研發，並有小販檔參與，01文化之前都有介紹過。圍裙係按需求度身訂造，例如有豬肉檔檔主想走文青風，就研發左一條牛仔料圍裙，加上外層可拆卸清潔白布，着上身後，又何嘗唔係一名爾雅嘅豬肉佬。當然仲有其他針對唔同用途款式，送畀阿媽都絕對唔失禮，唔會比佢鬧衰仔。

南豐紗廠其實係位於荃灣既嘅舊紗廠，見證香港紡織工業承傳，現進行全面翻新工程，預計於2018年落成，翻新後會叫The Mills。由於荃灣場地未完成好，所以市集會轉到中環舉行。靠紡織起家南豐唔忘本，計劃以紡織同工業為根基，交織出創新、文化及學習體驗，他們並非強調消費，而係着重環保與特色兼備，今次就回收工廠剩餘布料，用作禮物包裝，既精美又環保。