【得罪人多】毒舌招紙串盡現代人與事 「犬儒」手工梘浴室放負
當你某日拖住疲乏身軀返屋企，入浴室沖涼前發現梘液啱啱用晒，打開個櫃摷到上年聖誕節Party，成班朋友交換禮物的戰利品—— 一塊手工番梘。
朋友同你講，手工梘通常成份較天然溫和，無咁刺激皮膚，包裝簡單唔似梘液膠樽裝咁唔環保。你記得這番說話，好奇心驅使你即刻拆開使用，卻發現塊番梘招紙上面寫住「Soap for Introverts」，聞落無香味，因為「邊度都唔去」、「無存在感」。
張招紙用字好溫文，但唔知點解睇落超級「夭心夭肺」。你都唔肯定自己係咪內向自閉仔，但見到塊梘咁寫就覺得好冒犯，應該算崩口人忌崩口碗。
沖個涼都要畀梘串，有無咁搞笑吖？
Whiskey River Soap Co.好可能係世界上最政治不正確、最犬儒同負面的手工番梘品牌，腹黑招紙冷嘲熱諷，即使無粗口都Mean到爆，極盡抵死啜核。
不同香味針對不同性格、充滿弱點短處的群體，大玩刻板印象同標籤主義，毒舌抽水對象包羅萬有，幾乎「地圖砲」式串盡現代社會一切可笑荒誕的網絡文化、道德風氣、思想、政治的人與事。
由那段無厘頭自我介紹，應該睇得出Ｗhisky River是間惡搞意味十足的公司。他們標榜「絕非中國貨」、全部美國本土製造，深信質素同幽默並重的用品，是最吸引人和最令人認同。除了手工梘，Whisky River還生產沐浴彈、香薰蠟燭和最新推出的口袋筆記簿，一樣瘋狂。
「威士忌之河」窒人唔使本、又香又搞笑的手工梘應該製造了有近一百款，可謂「把世事都看透」，由網絡惡搞的鍵盤戰士、線上交友、自拍文化、中年危機、前度情人、老尷時刻（Awkward Moment）、假新聞（Fake News）以至一些西人先至明、華人得啖笑的光怪陸離都有涉獵。相信如果有人真係用來洗澡，沖涼水也會被這些手工梘即時抽乾。
Whisky River宣稱所有番梘的創作概念都在一個「不公開」、「已停用」的軍事練訓設施中構思，也許要有創辦者如此毫不正經、玩世不恭的奇特大腦，先可以保持高度的「吸濕能力」。不過亦非人人接受到Whisky River那幾近涼薄的黑色幽默感，有些網民就說手工梘千變萬化的色澤美學就比冷言冷笑吸引得多。
這些手工梘如今在官方網店有售，每塊平均價10蚊美元以下。自問唔心虛識自嘲，又或者想送舊畀睇唔順眼已久之人、兜個大圈串爆佢的朋友，不妨去官網、Facebook、Instagram同Pinterest觀摩下，實有一件隊中你。