【白人優越】「西人」傲視本地職場？　原來佢哋都有階級之分…

首先帶返個頭盔，SJ團隊絕對不同意任何形式的種族主義。但最近同幾位港男港女傾開， 發現在香港職場，首先除了大家已經不會陌生的的「白人優越」（White Privilege）現象以外， 原來眾多「白人」在職場甚至在與華裔香港人交往時，都存在不明文卻又約定俗成的「鄙視鏈」。

In case你在界限街以北生活或工作，較少接觸西人，所謂White Privilege 即白人在香港（或很多亞洲國家或地區）工作或生活時，唔多唔少得到的某些便利。例如，假如幾個人在同等職能的職位，一位英國同事的工作表現，往往較容易得到讚賞甚至升職。 走在茶餐廳，平時極不耐煩的侍應阿姐，如果面對香港人點菜慢左，已經口沫橫飛叫你快手，而面對黑人則可能已經中文破口大罵，但面對西人卻容易笑顏逐開。

再次強調，呢種 White Privilege 論調，絕非 SJ團隊提出，而係有大量社會科學研究支撐，包括哈佛商學院的評論 《  Our Separate Ways: Black and White Women and the Struggle for Professional Identity》Edmondson, Ella L. J.; Nkomo, Stella M. (2003).Harvard Business Review Press.

連網紅托哥都拍過片講，香港Expats收入真係多過華人好多，條片相信好多人睇過。當然，呢個亦唔代表係唔公平，可能確實因為佢地有料D。姑勿論所謂 White privilege是否公平，除了有些人認為的偏見以外，好多時候確實以西方文明為主的白種人比較信得過，大家睇下全球 Top 100大學位處邊D國家就知。正如特區高官子女都必須去英美讀書，廣東道同胞排長龍都係法國名店，大家就明晒。咁係香港，究竟香港「洋人」的鄙視鏈，又係點樣一回事？

話說有一晚， SJ同幾位在中環工作的外資行Banking朋友傾計，傾到呢個問題。一番討論，大家不約而同有類似以下鄙視鏈：

國家篇

英國 > 瑞士 > 美國 > 法國 > 德國 > 其他西歐及意大利 > 中歐 > 東歐 > 「以 -ia 為結尾的東歐國家 」

走在一些專業類Conference，往往係英國口音的Speakers最Presentable，自然流露出一種權威但有幽默親切的印象。 其次瑞士人，其中又分 German Swiss 與 French Swiss。歐洲之中，法國德國同為工業大國，但大家又會覺得法國文化更優雅，而德國人的形象容易與「沈悶」掛鉤。 當然，同時德國人感覺比較老實。

因此，在職場上往往亦係西歐 / 美國人佔優。而東歐好多以 -ia 結尾的國家，如保加利亞，阿美尼亞，甚至俄羅斯等，相對而言太「戰鬥民族」，尤其某一兩個國家甚至以盛產黑手黨惡霸著稱。IFC對開條天橋，成日有一些白人乞討「旅費」，卻被踢破其實係騙局，就係來自-ia結尾的國家。

職業篇

投行 Banking / 律師 / MNC > 做生意 > 做英文老師 > 做 Playgroup

來香港的洋人，職業上大概分3大類： 做專業人士，做生意，同埋教英文。 收入最高，往往係前者。唔好忘記，做專業人士，好多時除了賣知識以外，更加係賣形象。客戶（主觀地）覺得西人Advisors更可信，並非新聞，其中尤其係 Private Banking或者Architect呢D專業，有個Anglo-saxon或法文姓名簽署文件，梗係好似高級D，客最鍾意。

做生意的，往往係做貿易，從大陸入貨然後經香港再一櫃一櫃賣返去歐美老家呢類 。但呢個年頭做Trading唔容易搵錢，奔波勞碌可能都係賺份糧。最「食老本」的，往往係教英文，無需咩特別資歷（雖然近年已經比較困難），任何西人都可以來教英文，而其中最容易又係去 Playgroup之類做「外籍老師」。據說在Expats族群，一個一個圈子亦以職業來區分，壁壘分明，兩個英國人在香港，一個做 JP Morgan，一個最Playgroup，兩個人基本上永遠唔會有任何交集，可謂活在兩個世界。

配偶篇

白人 > 英文華人 > 中文華人 / 其他東南亞

Expats之間同樣一種基於政治正確 Political correctness永遠不會宣之於口的配偶勢利眼，就係盡量搵返個本國的配偶，而選擇與華人交往的話，又以 ABC或國際學校長大的華人為優先。唔明白的，睇下一些本地 Expats FB Groups，間唔中都會見到一些嘲笑 (或自嘲） 另一半英文差"I sink you are hansome" 。

子女學校篇

英基 > 歐美背景國際學校 > 本地背景國際學校 > 本地學校

呢個基本上同收入掛勾。 Banker子女肯定讀英基，而英文教師子女大部分讀本地學校。

興趣篇

飲酒 = 飲酒 = 飲酒

呢個相信係香港 Expats，無論國籍或階級，同等地熱愛的活動: Getting a drink!

SJ結語
平心而論，香港確實係「華洋雜處」好，而呢個亦係香港其中一個最有價值的地方。身為打工仔，假如遇到一位好的鬼佬老闆，有時更係好似中左Jackpot一樣…. 不過當然，都係個句，乜人都有好人，乜人都有壞人，大家勿論搵工定求偶，都要自己好好做下Due-D好好判斷啦！

【原文轉載自StealJobs.com。StealJobs全面透露各行各業人工，工時，晉升前景，以及入行攻略，歡迎匿名提供收入資料。】

立即下載《香港01》，緊貼公務員職位空缺、勞工處筍工推介，了解CV、面試致勝技巧！
下載網址：
https://hk01.app.link/bkbJyY5t4O