【職場人際】同事朝夕相處　始終朋友未滿　全因欠缺一種「基礎」

各種人際關係裏面，其中一種頗特殊，叫做同事。
一日24小時裏面，大家見同事隨時有8－10個鐘，好可能仲多過你見屋企人同另一半，更遠遠拋離大學畢業後，每個月才可能見一兩次的好朋友……

除了相聚時間多，好多時更係合作無間：從換水與影印機Jam紙，到做文件甚至Pitching及開會，好多工作都需要大家一齊做，日積月累漸漸培養默契以及信任，甚至係一種類近「友誼」的情誼。

然而，呢種情誼，卻總是難以登堂入室，同事始終是同事，與朋友始終就「爭咁少少」。

而且，呢種默契與情誼，雖然來得Intensive日見夜見，卻往往在轉工後黯然消逝，漸行漸遠終將成為陌路人。

同朋友唔同，大部分同事即使再熟，往往基於工作的基礎上，互相尊重對方私隱，都唔會對對方的身世有太深入了解。首先係你唔好意思問，問多了容易被視為八卦，有損自己形象；其次係即使對方講，好可能都點到即止，或者輕描淡寫，為的亦是保持自己形象：永遠不要在職場暴露自己弱點與痛處。有人話：

友誼的基礎就係建立於「互相披露關於自己的事情」的基礎上，從現況到過去，自身到身邊人的經歷。

一對好朋友，肯定知道對方住邊，父母做咩職業，中學大學讀邊間，甚至係對方心底裏一些委婉與軟肋，例如不愉快甚至不光彩的過去。

因此，同事在缺乏「互相披露」的情況下，做10年也難成為真正朋友。

即便如此，有時候，同事卻像一大班回到中學的少年，尤其係如果有得幾個年紀相若，都係Fresh Grad至工作4－5年的同事，身為職場新人，凡事感好奇，亦Work hard play hard，總有人會Plan幾時去邊間新餐廳「試新嘢」，甚至放假亦要約出來聚會與消遣。雖然話題往往離不開公司的各種問題與不公，例如老闆如何智障／賤格、客戶如何麻煩等等，但往往「共鳴感」最強烈，彷如《那些年》的一班被罰的學生，委屈卻能大家一起痛快笑痛快哭。

在加了暗號的Whatsapp Group裏，大家亦不時爆料互Send公司的最新情報，例如老闆剛到公司，提醒未到的同事好行快兩步然後低調潛入座位，以免被責難遲到。當然還有各式各樣的Viral搞笑相片與偶爾Stealjobs的文章，呢種Whatsapp Group全盛期，活躍程度係足以長期置頂。

但，天下豈有不散之筵席？一個類近朋友的好同事，終於有更好機會，轉投更大規模公司，人工Increment起碼40%，身為半個朋友的你，肯定叫對方即走，而且不要回頭。每次Farewell晚飯過後，西出陽關無故人，雖然大家依然身處中環或金鐘，亦難再相約聚首。畢竟，各有各忙。

久而久之，曾經好Friend的幾個同事，終於各奔前程，偶爾留下一個半個一直在舊公司，甚至扶搖直上，但曾經的舊同事的情懷，談到通宵方休的很多個晚飯飲酒之夜，早已此情不再。WhatsApp Group亦冇人再Send任何嘢，甚至開始有人退出群組，雖然可能係因為換電話，但確實原因亦早已經無需深究。

只是，偶爾「碌」電話，見到從前的WhatsApp Group與一大班人BBQ的相片，那種人人15k的青澀笑容，如今又在哪裏？ 在鏡子裏看見的自己，亦早已不是同一個人，何況路向與速度盡不同的其他人？

當然，大家都覺得青春萬歲，不想變老。但同時，it's nice to be able to afford things，以及慢慢累積職場上其他人一點點的尊重，總能帶來巨大的成功感。雖然，總是大家都人微言輕時，反而更容易嘻嘻哈哈。

如今，你坐在玻璃房內，批示着新人與下屬的工作，卻總是若有所思，而且不怎麼期待週末。

【原文轉載自StealJobs.com。StealJobs全面透露各行各業人工，工時，晉升前景，以及入行攻略，歡迎匿名提供收入資料。】