【職場Email】講得Feel Free To Call　結果冇人搵你　咁係代表…

所謂出得來行，預咗要還。出來社會搵食，都難免要承受自己口輕輕的承諾所帶來的後果。其中一個常見的口頭承諾，就係 “Feel free to call anytime”。

人在職場，好多人的電郵結尾都慣性一句"If you have any questions feel free to call anytime" (or equivalent)，或開會或打電話結尾時，都會話「有問題隨時Call我」。

結果會係點？ 基本上就係以下情景：

1. 客戶夜晚11點 Call你 問長問短考你功課

身為Account Manager 你個客仔話大唔大，話細唔細，一年都幫公司帶返一百幾十萬生意，點都要招呼下。所以，身為AM的你當然口響響話「隨時Call我！」。結果，你個客仔晚晚11點都毫無先兆下Call你手機，一開波就要你從Project盤古初開的細節開始講，講到現況，講到來緊你對香港市場的SWOT分析，講到12點半先Reluctant地接受你的解釋收線，然後聽晚又再Call你。

2. 上司一個Weekend Call你30次

有一種腦細，特別中意Weekend或其他公眾假期 call員工，交低自己聽日就唔記得的最新鴻圖大計，或generally追你呢樣個樣，問你做乜唔星期五前做起。呢種腦細，好可能缺乏家庭溫暖，放假時太得閒所致。

SJ特此呼籲所有上司：放工放假，無咩真正緊急野，真係唔好Call下屬。

3. 無人真係Call你　因為你Run得好順

雖然你對個個人都會話歡迎隨時Call你問野，但大家都唔會真係點Call你，因為你處理各項Items都好順，自動自覺定時定侯同客戶／同事匯報跟進。當然，點都有D麻煩友，但整體而言大家都會預留空間比你，呢個係最理想的情況。每日工作辛勤之後，你可以享受真．放工。Work-life balance? 你值得擁有！

4.  無人真係Call你　因為大家都怕咗你

無論返工時間或放工後，一樣無咩人真係會煩你，原因係在大家眼中，你係一個能力／品格上信唔過的人，交給你的工作你就一定帶到出公海然後就失埋蹤，係人對你都避之則吉。雖然你得到了安寧，但好可能你好快會失去埋份工，而且更重要的係失去你的Reputation，呢個好難修補。大家眼中你係個懶人，唔可靠的人，一旦定形，以後你唔使旨意升職加薪，做都最多做啲豬頭骨可有可無工作。

以上幾個情況，你又係邊一個呢？

SJ結語

大家有時可能覺得一切人同事都好麻煩，但其實有人去煩你，可能係因為他人信你對你有所期望，先會找你解決問題。 SJ常言道「唔好怕被人利用，被人利用代表你仲有價值」 （OK 其實係馬雲講的）。當然，亦有好多情況對方真係搵你笨，但整體而言，假如你有處理麻煩友的能力，以及有上乘的辦事能力，其實應該依然可以去到「無Call勝有Call」的最理想情況。

哪怕有一天真係無任何人煩你，可能才是你真正煩惱的開端。

【原文轉載自StealJobs.com。StealJobs全面透露各行各業人工，工時，晉升前景，以及入行攻略，歡迎匿名提供收入資料。】