【逆流大叔】三十而立 稜角抹掉 自然明白的人生「10大無奈」
畢業幾年，轉眼間所有人都必須面對一個問題，就係邁向30歲的關口。大家經歷過畢業後的新鮮感，或者畢業幾年的迷茫，甚至係Quarterlife crisis，無論你是否已經順利過渡呢啲階段，始終都要面對呢個30歲關口。
1. 嚴格來講 你已經唔再係「青年」
踏入30歲最明顯會經歷的一件事，就係你唔再被社會定義為青年。
唔計咩傑出青年分豬肉獎之類，好多青年特有的優惠或Privilege，在你身份證正式踏入30歲一刻突然結束，例如好多專業團體的 Young xxxxxx（職業）身份，甚至係Working Holiday計劃（31歲前結束），基本上隨住你踏入30歲陸陸續續就唔再關你事。
在職場上，二十幾歲人犯錯，往往較容易得到前輩提攜與提醒，但三十歲後，基本上你自己食自己了。
2. 開始同真正的年輕人脫節
咩Snapchat同IG，你開咗後發現完全陌生，更加唔會有朋友同你玩。你唯有繼續玩你的Good old Facebook / Whatsapp。 有睇「毛記」以為自己好潮？ 唔好意思，𠵱家啲細路原來更多睇韓國甚至大陸版的跑男。後生仔女聽韓國歌，睇咩Running Man，你完全冇概念，Spotify Playlist仲停留喺容祖兒年代，勉強聽下Ed Sheeran都已經覺得係一大挑戰。據說人在25歲後，基本上唔再想聽新歌，30歲左右甚至以上，更加如古老石山一樣。
在某日一個無關痛癢的小時刻，就係咁樣的小事，你發現自己真係唔再屬於「廿幾歲／20-29」呢個Demographic group。
3. …...然而 99%人距離「成功」依然好遠
如果話，後生的自由與激情，係幸福感的最大驅動力，「Post-後生」的人生，接軌的大概係成功與穩定。
二十幾歲時的沈旭暉，曾經在北京工作，月入2000人民幣，踩住單車，「離時代遠遠，沒人間煙火，毫無代價唱最幸福的歌」大概如此。
三十歲起，你開始有了一樣嘢，可以話係人生中最為重要，呢樣嘢叫做「責任」。
因為你開始有新的身份：丈夫、妻子、父親、母親、媳婦、女婿等等。呢啲新身份，全部都有你「應份」做的事，理應事業攀上頂峰（或起碼走進上升軌道），結婚買樓安居樂業，關注點從「玩」變為各種成熟的話題，從置業到裝修，擺酒到投資，然後係生兒育女與教育。雖然話做仔女一樣有好多責任，但Let's face it，大部份人的父母倘如避風港，即使外面風大雨大，父母始終都會睇住你，幫你補位。
社會來講，向來有三十而立之說。30歲，起碼要買到樓啩？唔好意思，市區20年樓兩房，都最少600萬，你人工幾多？畀得起200萬首期嗎？供得起每個月2萬嗎？
當然，更加進階的朋友，一樣有同樣問題。 當你做Auditor，30歲月入7萬， 但你起碼都想住太古城（而非600萬的殘舊「上車盤」），尤其30歲已經在Child-bearing age，準備生BB的話， 最好都要3房，盛惠1500萬。
好似係，無論你幾努力，你都追唔到呢班愈走愈快的火車。
4. 唔止成功，距離「成熟」都仲係好遙遠
成功固然冇得強求，只能盡力而為，而成熟卻往往係自己選擇，自己的態度問題，但我們絕大部分人而言，即使邁向30，都稱唔上成熟。
或者咁講，咩叫成熟？狹義來說，就係可以為咗肩負起「責任」而付出甚至作出犧牲。
當然唔同人有唔同責任，但絕大部份人面對都係以上所講的家庭責任，所以起碼係「修身，齊家」，理論上喺30歲左右要做好。
實際層面，點先算成熟？
月入15k，升職無望的冗員， 你會：
1) 進修增值自己
2) 做Part time 賺錢 ，定係
3) 晚晚玩「食雞」，放假就趕住一年飛3次日本、2次泰國？
星期五晚一大班人銅鑼灣食完飯，你住將軍澳，過咗尾班車，你係：
1) 辛苦少少搭N車 + 轉車 + 行路
2) $250 搭一程的士？
到你開始搵到下錢，月入6-7萬，你會：
1) 努力儲錢
2) 投資
3) 買返部 BMW 325 / ROLEX Daytona 威下?
要「成熟」，講係好容易，但每日做大大小小決定，抵抗好多引誘，同埋好多旁人的雜音，話你知「梗係去威」甚至激將法「你係咪使唔起先」，其實唔容易。呢個，亦去到擇友的問題。
5. 依然係「最佳損友」煩惱，但最Sad係你已經開始麻木
從前好朋友，隨年月過去各行各路，早已見慣不怪。
但邁向30歲，你發現同事、同學甚至客戶都有好多，但真正朋友——了解你、關心你的，原來少之又少。到某個位，你已經唔再Care，尤其係，相比起以上的各種現實的責任，呢個煩惱，雖然偶爾令人難過，卻其實早已變得不值一提。
「愈向着青春走遠，愈容易孤單，你可有發現？ 」
還記得，中學時期同Best Friend傾幾個鐘電話嗎？如今你假如想搵人傾偈，仲有冇人係你的 Go-to person，你深知隨時打過去佢都會同你傾？仲有冇你依然背得出電話號碼的朋友？
假如依然有的話，請好好珍惜。
6. 事業樽頸位 vs 人生樽頸位
正如以上所講，大部份人在三十而立之齡，其實都未真正站穩陣腳。SJ都認識一些朋友，雖然喺非常唔錯的大學畢業，甚至喺海外留學歸來，但接近三十歲依然浮浮沉沉，每年轉工，隔年轉行，而依然在Fresh Grad的職級打滾。
即使係已經成功嶄露頭角的朋友，例如好多到30歲月入5-10萬的朋友，其實一樣面對長遠而言的樽頸位，再往上爬的阻力，比起幾年前從Fresh Grad到今日的阻力大得多，高處不勝寒，正如市場預期騰訊/FB業績一年又一年永無止境地向上如火箭般直線上升，始終愈來愈難。
除咗事業以外，人生何尚唔會面對樽頸？尤其30歲呢種年齡。做一個真正有承擔的大人，除咗必須有事業根基，更要有魄力去為身邊人打點一切，are you ready？
最簡單一句，面對眾多親戚以及外面的朋友，30歲的你，已經有你父母輩的手腕去交際甚至博弈嗎？當然，呢個科網年代，可能呢啲嘢根本唔重要，呢個係後話了。
7. 錢…...依然唔夠
30歲左右，當你為自己戶口提升至咩Premier之類而內心暗喜時，才發現好快好快你又要將大部分Hard earned money使出去了，30歲後開支一闊三大，每個月使幾萬，對好多人而言，可能係冇選擇下的選擇。
8. 時間…...依然唔夠，而且強烈感覺 Time is running out
要OT的工種固然疲於奔命，但尤其在30歲起，你發現自己的Time commitment愈來愈多，家庭事業朋友進修，全部都係需要你本人的時間，讀一個Master就隨時係兩年時間，兩年後係咩光景？其實冇咩人可以肯定。
然而，愈想在人生各領域奮鬥及做得更好，愈發現時間唔夠用。
兒童的一天好快過去，一年卻很漫長。
但大人的一日好漫長，一年卻轉眼過去。
大概感覺如此吧。然後到每年年底，無論係電視台的新聞回顧，定係FB上的朋友回顧，你再自己思考返，究竟呢一年自己過的怎麼樣？有否達成到當初的新年願望？成日話學好日文，結果年復一年都冇Pick up返，依然流於50音多少少的基本水平。 畢竟，99.9%的人，就係被 Procrastination 奪取了所有夢想。
做任何事要成功，第一步，肯定係有「緊急感」（Sense of urgency），要做乜都好，今日就係最好的日子，冇其他選擇，Do it today，呢個係唯一你可以做到任何事的Mindset。
9. 稜角抹掉 理想冷卻了
呢個或者唔係人生無奈，或者係「成熟」？Well，視乎你點睇，同埋你係咩人。或者咁講，傲氣應該甩掉，但心底裏的傲骨與理想的一團火，唔好畀佢熄滅。
成熟 =/= 放棄理想，同樣地 堅持理想 =/= 一成不變。
呢個係一個「Balancing exercise」，但華人本質上好難做到呢種平衡遊戲，非黑即白的心態，通常走往極端：一係就全身投入權貴吃喝玩樂，一係就要瞓街甚至反社會或者浪迹天涯。人生，活得好，談何容易。
10. 再不努力 你就要老了！（更甚者，父母老了）
無論想追求什麼，必須呢刻就努力，你已經唔係20幾，唔係仲畀你慢慢探索的階段了。
固然，好多人都未搵到自己條路，或者好多人都好迷茫，但真係要急起直追啦。
相信大部分人，都好想早日同父母分享人生各領域的成功喜悅，可以Properly講一句：「阿媽，我得咗喇！」
只能說，
1) 確保父母身體健康，多督促飲食均衡 + 飲水 + 運動及作息
2) 自己更加努力了。
SJ結語
邁向30歲，唔同人有唔同感覺，有人興奮不已，但大部份人估計都仲係有點困惑甚至無奈，可能係因為呢個社會經濟環境？每人答案都好可能唔同。但可以肯定係，感受同感概呢回事，與其逃避，不如抒發出來，然後正面面對。
尤其係最近一單令人頗難過的新聞，或者亦間接地再提醒大家：人總需要勇敢生存。
希望大家多關心自己感受，多鼓勵身邊人，be positive。
【原文轉載自StealJobs.com。StealJobs全面透露各行各業人工，工時，晉升前景，以及入行攻略，歡迎匿名提供收入資料。】
打工仔財務自由的12個等級 搭港鐵、iPhone X、坐國泰都係指標？
所謂 「財務自由」 從來都係一個「相對」 的概念，視乎你自己的要求與期望。即使你成日覺得唔夠錢用，但分分鐘其實你已經係某程度的財務自由，只你一人未發覺！
立即下載《香港01》，緊貼公務員職位空缺、勞工處筍工推介，了解CV、面試致勝技巧！
下載網址：
https://hk01.app.link/bkbJyY5t4O
【自我增值】上司不教 錯不在他？ 過於依賴當心日後變老屎忽…