【專訪】田北俊評林鄭組班：劉江華hea　王冬勝離地　副局無人識

候任特首林鄭月娥為籌組班底「發惡夢」，部份位置仍未覓得合適人選，自由黨榮譽主席田北俊接受《香港01》訪問時表示，林鄭應換走民望低、市民覺得「好弊」的局長，但即使提拔能幹的副局長升任，民望不高也是問題，「好多市民連名都噏唔出，包括我。」

司局長獲中央信任是關鍵

林鄭月娥馬不停蹄接觸心儀人士組班，但多名局長表明無意留任，對外尋求人才亦頻頻「食檸檬」。田北俊指，政商界人士加入政府，必會看團隊成員質素，很多人現時「把持不定」，皆因部分局長民望低、表現差，「我加入呢個班子，你隊波踢得掂唔掂先？我係好掂嘅射手，後防、中場有無人傳到波畀我？」

田北俊表示，中央為特首人選提出四大標準，包括中央信任，此亦適用於司局長，即便林鄭想提名某人做局長，也要過中央一關，若北京對推薦人選「打回頭」，可能真的「唔夠人宣誓」。政界有傳民主黨成員羅致光被招攬入閣，出任勞福局長，又能否獲北京任命？田北俊稱讚對方是合適人選，為人溫和、願妥協，反而希望民主黨毋須要求羅退黨。

「劉江華入政府後如一隻純貓」

三司十三局中，政制及內地事務局局長譚志源已求去，盛傳接替人選卻是民望長期負數的民政局長劉江華。田北俊說，劉江華加入政府後極為低調，「好多人都無留意劉江華係局長，去立法會答問題，全部都係hea下hea下，hea完就算」，但這就是林鄭組班困難所在，「你數唔出劉江華有咩好唔妥，只不過畀人感覺無做嘢，但如果搵唔到人，你唔畀劉江華做搵邊個？」

田北俊笑言，劉江華以前做立法會議員「好打得」，但梁振英招攬他入政府後，「忽然變咗一隻好純嘅貓，都唔講嘢，如果林鄭叫佢打得，佢可能打得㗎。」

陳茂波「唔掂」　王冬勝查史美倫離地

至於財政司長人選，田北俊認為匯豐副主席王冬勝熟悉國際金融形勢，是合適人選，但香港市民關心的民生問題，王冬勝卻顯得離地，「香港福利應該點派？長者生活津貼入息資產上限，去到幾多先合理？大學學費、津貼等，我又唔覺得王冬勝識好多。」他又指，另一熱門、金融發展局主席查史美倫層次更高，質疑「要佢管濕濕碎碎嘅嘢，係咪真係咁掂？」

不過，無論誰人出任財爺，田北俊表明不贊成由陳茂波續任，「最弊佢係梁振英愛將嘛，你做得梁振英愛將，個個都覺得你唔荒掂啦，掂你都唔會做梁振英愛將！」他稱聽聞林鄭也覺得陳茂波「麻麻」，未來幾年國際形勢複雜，財政司長須具備宏觀視野。

自由黨日前稱推薦主席張宇人做教育局長，引起熱議，田少更在網上抽水稱「諗到呢條橋嘅人真係一個天才」。他笑言只是「為推薦而推薦」，張宇人確實有豐富教育履歷，但若林鄭招攬他入閣，要補選也很麻煩，但自由黨會向林鄭推薦年輕人加入政府出任政治助理。