東鐵｜12卡「烏蠅頭」列車今退役　大批鐵路迷趕乘尾班車：好可惜

東鐵線過海段將於本月15日通車，意味着12卡的中期翻新列車即將退役。俗稱「烏蠅頭」的12卡列車尾班車於今日（6日）下午1時於紅磡站開出，約中午12時已見不少鐵路迷在紅磡站守候。有鐵路迷曾於1999年乘搭最後一班「黃頭」電氣化火車，今日亦特意請假來見證「烏蠅頭」的最後一班車。
有鐵路迷打扮成內地列車站長，坦言對12卡列車退役感十分可惜，希望將來可作展覽，並笑言「舊嘅唔去新嘅唔嚟，希望九卡車捱得住啦」。

今日在紅磡站，不少鐵路迷一早到場守候。邵先生今日特意請假來乘搭最後一程12卡列車，他又帶同1999年電氣化火車退役時，乘坐最後一程車的證書。邵指，12卡列車座位佈置可看到外面風景，「無咗之後都好可惜，以後就一式一樣咁嘅設計，『烏蠅頭』設計係零零舍舍有啲唔同」，形容感覺有如被時代淘汰。他又稱，在12卡列車的最後一程，將為12卡列車「影多啲相，以後永遠留喺腦海入面」。

▼12卡「烏蠅頭」列車即將退役▼

鐵路迷陳先生︰由細到大同屋企人一齊坐呢架車返大陸同深圳　真係好開心

鐵路迷陳先生則因擔心太多人十分擠逼，故早上8至9時便到達紅磡站，他認為12卡列車是集體回憶，對其退役感十分可惜同遺憾，「不過可以坐咗咁耐都好開心，由細到大同屋企人一齊坐呢架車返大陸同深圳真係好開心。」他又直言已將「烏蠅頭」列車視作朋友一樣，是十分寶貴的回憶，會為12卡列車尾班車拍片，讓大家留念。

謝先生︰舊嘅唔去新嘅唔嚟

謝先生今日特意穿著內地列車站長的制服，他笑言「重要嘅日子隆重啲去記念，因為40年嘅列車最終要榮休啦，坐咗咁多年」。他又認為「舊嘅唔去新嘅唔嚟，希望九卡車捱得住啦」，並直言擔心九卡車運載力不足。

市民何先生居於北區，從小到大基乎每日乘搭東鐵到市區，帶同年幼兒子及列車模型乘搭尾班車。他笑言比「烏蠅頭」年輕一歲，並指對12卡列車非常不捨，「好深感情，見證讀書到出嚟做嘢，寧願去到紅磡再轉九卡車」。何先生又直言不滿九卡車，「又唔舒服、又細、又逼，（將來）一定會更加逼更加多人，車都唔使上」。

港鐵在12卡列車抵達沙田站後，舉行榮休儀式，當中東鐵線車長Jason駕駛列車16年，他稱12卡列車因地理環境因素實際上操作複雜，車長亦須「一眼關七，留意路面情況，都要監測列車運作」。

他又分享指列車駕駛途中不少收到乘客要求協助，「除咗手要揸車，仲要用埋腳控制通話按鈕，同車務控制中心保持聯繫，都幾考車長反應同專注力」。Jason又坦言不捨得12卡列車，「畢竟MLR（中期翻新列車）服務咗我哋咁多年」，不過相信與新九卡列車一樣可合作得好，為乘客提供優質服務，「遲啲帶大家過海」。

▼東鐵列車演變▼