守護長洲碼頭40載 碼頭督察宗哥：但願碼頭有擴建的一天
這個速食又追求刺激的年代，花數年去經營一件事都看似奢侈；不過，從事碼頭工作大半輩子的碼頭督察盧耀宗（宗哥）則十分享受這份專注和平淡，半個世紀在長洲渡輪碼頭打滾，由賣票員升至碼頭「揸fit人」，多年來見證碼頭興衰，經歷無數個日出日落，尚有一年就迎接退休，宗哥只願看到碼頭可以有擴建的一天。
延伸閱讀：全港最細！ 政府研擴建長洲渡輪碼頭 鄉委會倡駁長增兩泊位
現時由中環到長洲唯一的選擇是搭船，乘坐渡輪、快船35分鐘，慢船亦要55分鐘，經過一輪跌蕩飄流，終於見到長洲的堤壩，白色的碼頭映入眼簾，船隻停定、甫踏出船倉，白色和橙色交錯的通道彷彿為落船的乘客帶來一絲溫暖，正於碼頭向乘客打招呼的宗哥一身筆挺制服，微笑說道：「長洲碼頭就係遊客到長洲嘅第一站，亦係佢哋最先感受長洲到面貌嘅地方，所以我哋嘅角色好重要。」
長洲碼頭的兩條橋樑
宗哥拉一拉上身衣服的末端，將因舉起手而弄得有摺痕的西裝外套拉直，再抬起頭說：「通常啲遊客一落船就會問邊度邊度點去咁，我哋都會幫手教佢哋點去，希望可以畀到旅客一個好嘅印象。」講到工作的話題，宗哥總是滔滔不絕，由出生至今均居住在長洲小島的他，可以說是長洲的一本活地圖，北至北眺亭、南至張保仔洞，要如何前往都不是難題，不過，宗哥說着說着卻憶起一次被考起的經歷：「有個遊客一落船就問我澳門要點去，呢個真係唔知點應佢。」
「教路」無難度，碼頭督察還有甚麼工作呢？宗哥這天忙個不停，巡視完碼頭各個位置後，又要監察船隻離岸和靠岸的安全，好不容易停下來，但用以計帳的板子卻從未放下，就算坐下來都一直緊盯着板上的數字，宗哥邊看邊說：「我嘅角色基本上就係管理成個碼頭嘅運作，事無大小都要指揮監察，同時亦要將總部的指令下達畀其他員工、又收集工作人員嘅意見，所以都可以話係公司同員工之間的橋樑。同樣地，我哋都照顧住每個出入的島民，亦是船公司同島民的橋樑。」
40年時間煉成碼頭督察
要成為這兩條重要的「橋樑」，當然並非一朝一夕能煉成，宗哥的「提煉期」就將近40年：「當時有船公司請人，咁我覺得呢份工都唔錯，安安穩穩咁，我又無話特別想出去闖，所以就應徵咗。」當年由碼頭助理做起，後來轉往新渡輪工作，再一步一步踏上督察之位，回首看來宗哥坦言最難忘的是颱風：「好似1979年荷貝咁當時好勁㗎嘛，又驚啲風浪摑上碼頭，要堆啲沙包防止水浸，好彩最後都無大意外，不過，我哋每次打風都係要嚴陣以待，由掛起風球嘅一刻到落波，我哋都要堅守喺碼頭，無得瞓㗎！」
長洲碼頭久歷風霜，但原來並非牢不可破，這座建築70年代落成至今從未擴建，雖然中途有粉飾過，但船的泊位卻始終只有兩個：「以前得島民會出入長洲，所以現有嘅碼頭面積應付到，但依家好多人入嚟，最多都只可以加密船嘅班次，不過都好難搞，好似大時大節咁啲人甚至要排到出街，所以我都希望政府批准擴建啦，呢個都係我嘅心願。」
說着念着總是碼頭，但原來宗哥再工作多一年就會退休：「退休之後都會湊孫，孫仔都間唔中會嚟探我，得閒又會睇吓船咁。」如此一來，退休莫非為培育下一代接班人？ 宗哥站起來，拉直西裝外套，笑言：「都要睇佢興趣㗎，不過如果佢想都唔錯。」