新冠疫苗｜六旬中港司機血壓略高　臨場暫緩接種︰無理由搵命博

本港新冠肺炎疫苗開打，接二連三有接種者懷疑接種後感不適及死亡個案。昨再有一名51歲男子打針後，急性心肌梗塞危殆，留醫深切治療部。其接種疫苗地點沙田源禾路體育館社區疫苗接種中心，今早（10日）仍有大批長者如常到場打針，普遍認為是個別異常事件，無損對內地生產科興疫苗信心。
不過，有年逾60歲、以及「三高」的中港司機，因疫苗中心的在場醫生，指其血壓略高。他衡量下，終決定暫緩接種，「咁多60幾歲人出事，緊係驚啦，無理由搵自己條命博。」

63歲的中港司機林先生，今天與同事前來接種疫苗，方便日後重新開關後復工。但他指，自己有「三高」問題，出門前已量度糖尿及血壓度數，其中血壓的上壓為143、下壓為86，經諮詢接種中心駐場醫生，決定暫緩打針，「佢睇完後都話略高，話都可以打，但為安全起見，可以先問返私家醫生，睇吓會唔會有血壓藥，低返先考慮接種。」

林先生表示，自己年逾60歲，科興疫苗在其他地方，列明供18至59歲接種，「係我自己驚啫，唔關佢哋俾唔俾打。」林生又指，近來接二連三有年逾60歲人士接種後出事，「緊係驚啦，無理由搵自己條命博」，遂決定回去詢問家庭醫生意見，「由細睇到大嘅醫生，會知道我體質，但呢啲（駐場醫生）只係睇到表面（臨床表徵），一針落去就係㗎啦，所以會再問返（家庭醫生），再決定打定唔打。」

他又提到，不論是接種科興或BioNTech疫苗亦可，會視乎身體狀況決定，「 如果自己身體能夠承受，打咩都OK，否則就算有寶藥俾你，做神仙都冇用。」

接種者︰接種疫苗比不接種安全

62歲李先生認為，以機率而言，接種始終比不接種安全，「你出去曝露空氣中，會有機會感染，但你打咗針，計算風險比率，絕對有著數。」他續指，對科興有信心，「係國產，但外面有好多不實報道，出咗事就無限擴大，唔會差得過其他疫苗，只係俾人造謠中傷。」他又指，現時預約打針常爆滿，惟源禾路仍然有位，「可能呢間尋日有人出事」，但他認為，偶有異常個案實屬正常，萬中無一則是「無可能嘅事」，「行街都有可能有嘢跌落嚟撼親頭，但唔一定係自己㗎嘛。」

58歲、任職導遊郭小姐亦預約打針，「無信心唔會過嚟打。」被問到有接種者打針後出現異常，她指是正常情況，「食藥後都有機會有事。」郭小姐又指，選擇科興是由於認為其性質相比下較適合自己，衡量副作用等決定接種，「好似流感疫苗咁，等你自己有抵抗力，認為較安全。」

75歲陳生及69歲陳太，昨經郵局協助預約，他們指，知悉有長者接種後感不適，甚至死亡，但認為是本身有長期病所致，「佢哋本身身體唔好，就算唔打都會有(事)。」陳生表示，兩人健康「過得去」，事前亦無專程諮詢醫生。被問到是否擔心出現併發症，他倆均指不擔心，且政府高官亦已接種：「唔驚，大人物都打， 如果有副作用佢哋都知。」雖然家人有勸喻「睇定啲先」，但他認為科興由中國生產，「信中國，唔會害你嘅。」

營運源禾路體育館接種中心百本專業護理服務有限公司主席奚曉珠表示，對於有市民在該中心接種後有嚴重不適事件，經翻查紀錄後，發現該名市民於接種後30分鐘的休息期間，未有向在場職員表示身體不適，事前亦未有提出諮詢在場醫生。奚曉珠續指，該市民接種後數天入院，另專家就早前個案的因果關係評估顯示與疫苗無關，相信今次屬個別事件，「打針後唔舒服只係極少數。」

她表示，接二連三有注射疫苗報道，外界觀感「無咁好」，但相信市民會根據客觀資訊自行判斷。