【茶樓今昔】蝦餃燒賣平過包點　茶客為「走數」拋點心籠落海？

飲茶叫點心可以一籠三款？蝦餃燒賣平過包點？憑裝修可分到茶樓？這並非新茶樓的噱頭，而是舊式茶樓的特色。
現時飲茶文化猶在，但茶樓的裝潢及營運模式均有別於數十年前，喜愛研究舊茶樓文化的梁廣福直言，不少傳統點心製作費事考工夫，幾乎在連鎖酒樓中絕跡，而舊日茶樓的豪華裝潢更是宣傳特色之一。

舊茶樓雕龍雕鳳　擁自己特色
新式茶樓的裝潢、格局及設計大致相若，但現年58歲、10歲時曾在茶樓做「童工」、《再會茶樓歲月》的作者梁廣福指出，數十年前茶樓多屬老闆物業，不少人都會花心思佈置，客人從裝潢可輕易認出茶樓：「舊茶樓通常是自己物業，會整到好靚，裝潢好靚，雕龍雕鳳，好有自己特色，一講就講得出邊間茶樓。」

他舉例指，不少酒樓會將桌椅設計成不規則，靠窗位甚至會是半圓型設計，但本港近年地價貴、租金高企，佔用位置的特色設計幾乎絕跡：「現時不會有，不會浪費位置；租貴，即使是酒樓東主亦不知可以做幾耐，索性不做這些裝潢，亦是舊式酒樓式微的主因。」

燒腩卷、大包大件夾抵食　難有營利漸被淘汰　
另外，現時普遍茶樓提供的點心種類與數十年前亦有分別，過去有的燒腩卷、三寶大包、魚肚燒賣、煎堆、西米焗布甸等，雖然用料不貴，但卻現今難在茶樓找到。

梁廣福解釋，此類點心花時間又考工夫，而且易飽肚，茶樓從商業角度考慮，多不傾向出售：「大包、西米布甸，易食飽人，所以酒樓從經營成本考慮，就不會做大件夾抵食的包點。」

將點心竹籠放隔離枱或枱底　甚至拋落海？
新式、舊式茶樓雖然同以點心數目計數，但收費模式不盡相同。現今飲茶是先填點心紙，用餐後憑電腦系統計算收費；但70、80年代則以竹籠數目計，一般竹籠愈大價格愈高，但若有相熟親友任職，除了不用等位，更可以「攞著數」：「如果有熟人、親戚光顧，樓面會行開，我就將他們食完的籠收起，即使好多朋友來食，最後埋單亦只有幾籠」。

他笑言，部分不老實的客人會趁職員不為意時，會將竹籠放隔離枱或枱底，甚至坐緊海邊，從窗口將竹籠拋落海，逃避收費：「以前無閉路電視，放隔離枱或枱底就無得追究，而蓋點心印可『揸流攤』，有個動作，但無蓋到，照走到數。所以後來出單，用電腦計數。」