【社區狂想】大埔坐船出中環？大帽山起地鐵站？網民認真mode熱議

庸碌生活，但一樣可以dream big。「社區狂想」期望搜集最在地用家的奇想妙計，最接地氣的靈感，或會比政府官僚思維更有想像力更見效益？說不定噏下噏下，有天真的能實現。
成日話政府交通策略「鐵路為先」，搞死巴士同小巴。打工仔日日返工，揀巴士就驚塞車，無選擇之下，幾逼都要搭港鐵。大家可會想像，如果地鐵開站任你揀，你會想邊度有站？大家又有冇諗過可以重新發展海上交通，起碼唔會「塞船」先？

一、大埔搭船出中環

Facebook「Tai Po 大埔」群組上星期就有網友發揮小宇宙，建議開設馬料水－大埔－中環航線試行六個月；建議非常認真，更列明邊個公眾碼頭上落客、價錢、班次等資料。 但係，呢位網友提出嘅建議一出就比其他人話一個鐘搭船出中環無可能，因為中環出長洲都要約一個鐘；大埔出中環起碼都要三、四個鐘，可能朝早出發去到中環就直落食Lunch。

林村河變運河直出中環？

這條航線其實非常寫意，途徑馬鞍山、海下灣海岸公園，繞過「香港後花園」西貢，一直出到清水灣再繞入將軍澳、鯉魚門，飽覽維多利亞港兩岸景色，最後到達中環。 有人留言提議不如供應埋早餐，用APP訂餐，可能吸引到唔少人；有人仲話一定要有餐蛋麵！

不過路線長，隨時要搭三四個鐘；返工就未必適合啦，如果包裝到假日、旅遊路線又得唔得先？仲可以順便鼓勵遊客少啲搭東鐵線，大家搭車就唔使咁辛苦！

考慮到路程長，網民更加提議將林村河改建成運河直出中環；但係有人話林村河有時無水，咁點算好？有網民發揮物盡其用的香港精神，提議將香港人每年買多咗嘅東江水引入運河，得咗！

超過170個公眾碼頭，可以點用？

有人留言，認真提議加設航線由大尾篤來往大埔。根據土木工程拓展署的網站，該署負責保養超過170個的公眾碼頭。香港咁多公眾碼頭，如果淨係諗航線，都可以好多組合。例如小西灣搭船去科技大學？南港島沙灘之旅，一次過去晒淺水灣、石澳、大浪灣、赤柱等地？

話說，原來2000年之前，荃灣和屯門真的有船出中環；赤鱲角本來都有本地渡輪碼頭往返屯門，如果復辦有冇得諗？如果可以加設航線，讓香港人在日日迫到咸魚咁嘅現實下多一個選擇，吹吹海風，思考人生意義，你又有咩諗法？

二、港鐵未來路線圖 ： 蒲台島都有站？

港鐵南港島線已經開幕一段時間，將來還有沙中線落成，香港的鐵路會發展成點？2012年曾，經有一張由「KJ9384LC」製作的港鐵路綫圖在網上流傳，連大帽山都有站。港鐵迷Iain MacDonald去年就另外製作了一份誠意十足的港鐵未來路線圖，製作認真。

大部分路線都是幻想出來，連東龍洲、「香港南極」蒲台島、長洲都有站，咁大帽山出站要搭幾耐𨋢？

最厲害都莫過於連接堅尼地城同坪洲的港島線延伸。不過，香港都可以起港珠澳大橋同東大嶼都會，可能港島線延伸到大嶼山都唔係無可能？可能講講下真係會成真，你又想邊度有地鐵站？

資料來源：https://ijmacd.com/2016/07/mtr-future-system-map/