【西裝的故事．五】當81歲老師傅遇上最差學生：點解教極都唔識？
8個月前有個徹徹底底的門外漢，無縫紉的底子，也不懂車衣，想創業開西裝店，心口掛住個「勇」字，就到職訓局上課，他是Roy。在職訓局任教的邱復興教過上百個學生造西裝，Roy那一班12人，畢業時全班只有Roy不合格，西裝褸變了背心，手袖都未縫上。
8個月後，他造了一件新西裝褸，在邱師傅幫忙下縫好一邊手袖，望住鏡子，兩師徒都笑了。
結婚訂西裝 諗到條創業橋
Roy前年年底向女朋友求婚，2個月後女朋友選婚紗，他就訂西裝，一訂才發現大部分西裝都不合身，有些拍照時看起來好看，襯搭起來卻不太合襯，找心頭好那麼困難，他心想：「會唔會客人好似我咁奄尖呢？」想一想，熱愛創業的他就萌生學造西裝、開西裝店的念頭。毫無經驗，就報讀西裝課，次次早返遲走，上堂仍落後同學一大截。
邱師傅對這個進度較慢的學生也印象深刻，「同一樣嘢，左邊做到，點解右邊又做唔到呢？點解呢？唔會咁差咖」，邱師傅憶起Roy在職訓局上堂的情況也忍不住笑出來，「有時都會忟啲。」「嗰時都會覺得師傅係咪特別唔中意我呢？點解會咁？」，兩師生心中都暗生疑問。
一班12人 唯獨自己不合格
邱師傅起初以為Roy不用功，「唔肯做筆記，又唔睇書」，他又停一停，「都有可能係睇完睇唔明，但睇唔明要問呀嘛。」遇上怎麼學都不會的Roy，邱師傅也很頭痛。結果學期完結，全班只有Roy不合格，本應完成的西裝，兩邊手袖都未縫上。
不過邱師傅這時候已對Roy改觀，「有一次佢做一樣嘢，比其他人都做得更好，我咪同啲同學講『佢都做到，仲好過你哋』」，他說完自己也笑一笑。全班唯一一個「肥佬」，那麼丟臉，可能很多人已經選擇放棄，但Roy相信「學無前後，達者為先」，一於繼續學。幾個同學剛好想繼續精進，於是一起邀請邱師傅繼續私下上課。
【西裝的故事．一】81歲老師傅話當年 放假着老西行豪宅區追女仔
【西裝的故事．三】81歲老師傅縫西裝到寫詩 當年轉行要行賄
【西裝的故事．四】老師傅65歲執教鞭 80歲出書教造西裝
「肥佬」都唔放棄 小班繼續學
自此，邱師傅每星期花3小時，與Roy及另外3個同學小班上堂，仔細指導造西裝的各個步驟。小班上課的好處是，學生可因應自己的問題，再向邱師傅請教，邱師傅亦較容易發現學生的需要。
有學生用衣車縫合布料，邱師傅走過，「你睇下呢條唔係直線和」，他拿起布料，在學生身邊指著布邊仔細講解。Roy在旁縫手袖，一個他從未試過完成的步驟，他穿針縫了幾步，又停下手，邱師傅見狀就過來幫忙，三兩下子手袖就與上衣二合為一。
只要有心機，一定可以成功。見過不如做過，做過不如再做過，做人都係咁。
讓學生做做看 見過不如做過
Roy穿起這件只有一邊衣袖的西裝，到鏡子前試身，邱師傅和幾個同學都在旁邊看合不合身，袖子、肩膀位置有沒有起皺紋，衣領是否貼頸，外套會不會過長。這個曾經不合格的學生，終於穿上一件自己親手造的「有袖西裝」。
西裝還沒完成，還差一邊衣袖，不過今次師傅不會代勞了，「我會做俾佢睇，但成日靠我唔得，唔試過，唔做過，第二件又會唔識。」Roy就是喜歡邱師傅這樣教，「明知我地做唔好，佢都會叫我試下，唔好佢再幫手，俾你有信心去試，而唔係幫你整。」
下月正式開西裝店 師傅不擔心
Roy希望自己學好造西裝的手藝再開店，所以堅持開店前要上西裝班，他請了幾個西裝師傅幫忙，下月西裝店會正式開業，與太太夫妻檔經營。經歷失敗再到新開始，他有幾句話想告訴邱師傅，「 多謝你好無私咁教我哋，冇理我哋資質好唔好，我知道你冇義務去教我哋，但好多謝你願意教我。」
Roy覺得自己是個幸運兒， 遇上一個願意由零開始教自己的師傅。見到昔日成績最差的徒弟開舖， 師父並不擔心，「 只要有心機，一定可以成功。手藝嘅嘢都係見過不如做過，做過不如再做過，做人都係咁」。 邱師傅只想給他一個小提示，「開西裝店買料唔難，最重要係搵到好師傅幫手。」
一老一少，因為一套西裝，走在一起，與西裝結不解之緣。