【來稿】西九龍中心嘅廉價騎呢，就係其存在意義
西九龍中心趕走5蚊兩球雪糕小店，爆出公關災難。係因為定價太平頂爛市？抑或店主得罪咗業主？我唔知。我只係知，呢度嘅裝修格局從90年代冇變過，𠵱家個廁所走廊仲貼住周秀娜、Twins嘅登台相！我有合理懷疑，廉價同騎呢就係佢唯一賣點，如果有一日佢唔再廉價騎呢，點解我哋仲要去？
外人覺得深水埗有好多低下階層，但以前嘅西九龍中心一樣包容。你估每個商場都咁大方？喺圓方，對窮L嚟講，你負擔得起嘅可能只有住宅平台嗰幾啖空氣。但舊時嘅西九龍中心，無論你係公屋仔女、劏房戶定紙皮阿婆，都可以喺入面用蔗渣價錢買到各自嘅的娛樂。
蔗渣價錢 買到娛樂滿足
呢度冇意大利Gelato ，但有5蚊兩球拳頭咁大嘅雪糕。冇潮牌同A&F，但「蘋果商場」淘寶貨着上身都差唔多啫。小朋友去唔到海洋公園？唔緊要，幾蚊都可以去奇趣天地坐碰碰車、掟幾粒波仔。日本料理更加唔使講，有連美國前駐港領事夏千福BB都唔敢挑戰嘅明將壽司，威震四方。畀唔起錢都唔緊要，8樓美食廣場可以任坐，飛雪溜冰場嘅白雪景色免費任睇；唔鐘意坐，又可以挨住欄杆俯視眾生，望吓人望吓騎呢𡃁模show，過吓日辰。
【西九龍中心】90後難忘奇趣天地、迷你版海盜船：曾經係潮流指標
明明係一個穩定地落後於時代嘅商場，但西九龍中心竟然一直吸引到明星嚟踏旺個場。從2000年代嘅Twins、容祖兒、Boyz，到𡃁模、AV女優，甚至AKB48都留低過幾條腳毛。今日，𨋢口同廁所塊牆仲詭異咁保留住過氣明星嘅出show相，更有疑似未整容前嘅原貌，瀰漫住一種90年代嘅沒落氛圍。睇新聞先知，原來男子組合Sun Boyz曾經喺西九龍出show嗰陣，從5樓吊住威也飛落嚟，AV女優小澤瑪利亞喺度搞過……抱抱會。喺𡃁模大亂鬥嘅年頭，仲有唔少乜乜baby喺度寸其他靚模，話人哋老、個波係假。
包容騎呢異族的溫柔
最難得嘅係，萬千宅男日盼夜丁嘅日本女子組合AKB48，竟然試過喺西九龍中心開設全球首間海外專賣店，仲嚟港宣傳，搞到班宅男鬼咁hapi。近年，西九龍中心亦開設咗唔少小眾興趣嘅舖頭，好似Lego店、羊毛毯手作店，6樓同7樓仲成為盲人按摩店嘅集中地。就係咁，西九龍可以將社會上窮嘅、另類嘅、小眾嘅、宅嘅、毒嘅乜都撈埋一齊。即使呢度娘，唔夠光鮮，冇圓方嘅貴氣或者apm嘅潮流，但香港邊度仲有咁接地氣嘅商場，有咁包容嘅空間，將社會上面唔同小眾又弱勢嘅群體溝埋一齊，畀佢地用少少嘅消費同社會接軌？
不過，連深水埗重建舊樓都可以包裝到市中心豪宅咁浮誇嘅年頭，西九龍中心唔續租小店，係咪想升呢為西九龍「圓方」？AKB48專門店已經搬走，明將都執埋，變成價錢貴一截嘅「韓日燒BBQ」。香港已經冇乜偶像明星再會去西九龍，或者咁講，香港根本再冇偶像明星。當今日喺深水埗都可飲到杯文青手工咖啡嗰陣，仲有乜嘢唔會變？ 如果有朝一日，西九龍變得唔再西九龍，再冇劣食同𡃁模女優，嗰班跟唔上時代、被社會遺忘嘅人，仲可以喺邊度存在？