【來稿】新界西大學生的苦衷：朋友間都會Long-d，嚴重起來會分手

作為一個土生土長的九龍人，朋友圈子的核心範圍基本上都在九龍。直到我study abroad，移民左新界⋯⋯西大學，一夜之間，我好似冇哂朋友咁。
撰文：新界最西人

小學：隔籬村的同學

那些年，仍未有「贏在起跑線」此等高階哲理，阿媽說最重要是起跑線和終點近。於是，我們三姊弟都讀屋邨小學。因為學校在家對面，由出門至達陣只不過是3分鐘。作為一個小學生，冬天與床纏綿至7點55分才起身，5分鐘梳洗，8時05分，宣佈勝利。3分鐘的距離，我覺得我已經是人生贏家。

當時世界還是很公平，人生贏家不只我一個。我住在小學的對面，阿A住在小學左邊，阿B住斜對面。阿C住我樓下，阿D住同一幢樓的二樓，反正，那個時候，去最遠那個朋友家，不過是隔壁邨，10分鐘。小學時代，我們記住的是朋友住咩樓咩室。

中學：隔籬站的朋友

後來升讀地區中學，朋友圈子由一條邨擴展至同一條地鐵線距離，隔籬邨變隔籬站。那時，多了一個樂趣，與同站的朋友孖公仔般返學放學。我們記住的是朋友咩站等車，咩站落車。當時，聽說有個同學住東涌，我們每天都為他哀悼。直到大學，我先知什麼是「天外有天」，因為我入咗最西的大學讀書，係呀，近期好Hit個新界西呀，想知新界西民族，每天如何在屯門公路與西鐵之間的掙扎，詳情請看「新界西人絕對係一群堅毅嘅物種​」

大學：隔.離

而我要說的是朋友之間Long-D的故事。對，朋友也有Long-D，嚴重起來也可「分手」。開展三年新界西大學住宿生活後，舊朋友說了一句：「你好似消失咗。」

幾年後，我回想，什麼時候有些老友愈走愈遠，有些老死即使半年不見，一見面送你一句「喂，你又肥咗。」就知他們如最初，幾遠都係一世。我發現，入讀新界西大學，其一好處係，你知道邊啲係forever friends。

我放低嘅唔係一餐飯時間，係一晚。

下次下次⋯⋯大概可以⋯⋯

做了半個新界西人，不用戴錶，忽然，做人很有時間觀念。每次約朋友，你都會計一計－－朋友約七時九龍吃飯，你開始運算：要七時達陣，必須5時30分出發，哎呀，中間撞正放工浪潮，要再早一點出門，要5點落堂才可以⋯⋯今堂好像有幾組同學要Present、又或者今堂是長氣老師、個課室又冇人用，一定會不停「講埋兩句」，一定遲到啦！又或者你會話：「今晚好趕呀，下次啦！」

下次下次，朋友會說做人不要輕易放棄，那我們約八點就可以啦。你唔明新西界人來回的陣痛。屯門出嚟唔算長佂，而我說的是「來回」，來回才是長征。

朋友慣常一句「忙，都要食飯㗎！」第一次聽到這話，我深感認同，欣然赴約，「朋友是要見的。」試過一次，內心小劇場便出現：「係呀，忙都要放低個Project，食個飯。」但你很快便會做「灰姑娘」－－「心灰」的姑娘：來回三小時多，坐下傾兩句才只有一小時，於是你只好黯然道：「我放低嘅唔係一餐飯時間，係一晚。」

周末好友見面要排期

新界人永遠參與不了一場遊戲叫「即興」，一個星期一次的「周末檔期」要一早度好。平日返學，星期六就會「思鄉」－－九龍，對於平日買$28.9有9包出前一丁做午餐的新界西大學生，會產生對住家飯的殷切渴望，所以星期六必定留給家人。於是，只剩下一個星期日，朋友圈ABCD都想約。為了信義，唯有實行「先得先得，派完即止」的原則，只見最先約好的老友。有時，周末忙莊務忙Project留在宿舍，又要再等五日才可出城。14日不見即隔半月，老友覺得「約你都要排期咁」。

問我有沒有 確實也沒有一直躲避的藉口 非甚麼大仇 為何舊知己在最後變不到老友

朋友放棄見面　唯有煲電話粥

朋友放棄會面，我們改傾電話。夜晚，老友打來閒聊或訴苦。突然，鬧鐘響。「唔好意思，我陣間打比你，我夠鐘乾個衣。」我明，傾得興起，又或者情緒蘊釀好，導演嗌「CUT」，再打返去，氣氛已經不是那回事。我明，所以我放棄過堆衫。對於住宿的人，夜晚是黃金時間，包括洗衫乾衫。一幢宿舍，洗衣機乾衣機各三部，人呢就二百幾。你要計準時間，否則，我真係試過，兩點先洗到衫。

對白同樣適用於沖涼，「唔好意思，我陣間打返比你，我夠鐘沖個涼。」12點後適合搞心事台，但同樣是沖涼高峰期。沖涼，好似打仗咁，要耳聽八方。試過層層沖涼房爆滿，你一聽到冇哂水聲（好彩，住得近廁所先聽到音樂聲，呢刻覺得小學好幼稚，原來呢啲先叫贏在起跑線），得返手機播歌，你好拎定衫企係門口喇，等佢手機都停埋歌先開門衝？冇喇，女人沖涼要幾耐？我自己都唔識計，一不小心只可以等寂寞到夜深。

明明大家都生活在香港，你同朋友好似有時差，生活時差。遷就得一兩次，你也會累，大家都是學生，一樣要忙Project、忙莊務、忙靡爛的生活，不同的是剩下的時間空隙，你的生活就被瑣碎事填滿。後來，你同老友沒吵過架，什麼事都沒發生，就這樣慢慢疏遠。偶爾的Whatsapp只剩下：「新年快樂」、「生日快樂」和「得閒食個飯」。

朋友連屯門喺邊都唔知，我只好答：「比天水圍再入啲呀，可能我畢業禮你先會入嚟。」當初一句戲言，最終成真。

《秒速5厘米》現實版

「不如你入嚟屯門食個飯？」老友說「好遠呀！」。我想起《秒速5厘米》，男女主角本是鄰居，搬家後相距2小時車程，再後來搬至相距1600公里，共24小時車程，相隔十三年偶遇，已各有各生活。那時我想不透，究竟是距離遠，還是時間遠，所以他們才愈走愈遠？

即使由天水圍至柴灣的距離不過是50公里，我依然想不透，是屯門和九龍港島之間遠，還是那來回三小時遠？後來，我學懂一個詞語「生活距離」。老友大多從未踏足過屯門，包括我自己，可能他們實際連屯門喺邊都唔知，我只好答：「比天水圍再入啲呀，可能我畢業禮你先會入嚟。」當初一句戲言，最終成真。