天水圍醫院開業　婆婆「求醫路」冇瓦遮頭　嘆馬路欠紅綠燈好危險

「睇車呀！睇車呀！」身兼天水圍醫療關注組成員的街坊清早到達天水圍醫院門外，一行七、八人對住馬路好激氣：「條馬路好彎，又無斑馬線，車駛埋黎根本睇唔到！」由第一個區內屋邨天耀邨1992年入伙至今，天水圍人等醫院等了25年，新醫院今日（1月9日）終於落成啟用，但街坊的睇醫生故事卻剛剛正式開始：試想像你是一個85歲的婆婆，兩膝關節退化，右眼青光眼，從天恩邨步行至新醫院，還得擔心夜晚有事無急症睇，這到底是怎樣的一趟求醫路？

25分鐘路程無遮無掩　求醫路猶如長征

85歲的翁婆婆居住在天恩邨，她兩膝骨退化（骨性關節炎），行動較緩慢，步行至新醫院需時25分鐘。她須看骨科及眼科門診，以往睇腳時要跨區去屯門醫院，睇眼則定期到屯門置樂花園附近睇私家醫生，路程均需時一小時以上。現在天水圍醫院落成，應診路程減一半，她認為方便好多；但人在路上，不便的細節卻俯拾皆是。

「你哋後生，望落條路覺得近，我行得『摩』，行下要唞下。」翁婆婆首先要經過馬路穿過天恩商場，乘扶手電梯上一層穿過天橋後，再乘電梯落地面經過屋邨公園。途中，上落電梯不在話下，翁婆婆在橫跨商場入口時，往往需費力挨近門柱上落壆位，預防自己跌倒受傷。而路上遮陰設施不多，翁婆婆指屯門醫院的求診路雖然較遠，但有瓦遮頭，日曬雨淋也不怕，相反從屋邨走到天水圍醫院範圍就遮陰較少，翁婆婆說夏天唯有戴備水、毛巾和雨傘以備不時之需。

她坦言：「有醫院都已經好滿足。喺香港，慣咗啦，個個都係咁，有啲人手抱嬰兒晨早排隊睇醫生；我哋幾十歲又無工作，（遠征求診）好正常。」

醫院入口沒有紅綠燈的馬路　比虎口更危險

到新醫院門口，翁婆婆須橫過天壇街馬路，但馬路上並無交通燈，亦無斑馬線。患眼疾的翁婆婆只有左眼視力較好：「我矇查查，望落啲車一舊舊，應該整返個紅綠燈。」當中尤以醫院正門對出路段最為危險，行人橫過大彎位時，無法看清兩邊駛近的車輛，街坊們認為應加設紅綠燈。

馬路亦缺乏無障礙斜台，翁婆婆抵達行人路時要先挪高小腿，用手壓著路柱，慢慢穩定腳步再走上行人路：「整返個斜台就好啲。」附近地盤出入口舖設的鐵板不平，對長者亦相當不便。

有醫院都已經好滿足。喺香港，慣咗啦，個個都係咁，有啲人手抱嬰兒晨早排隊睇醫生；我哋幾十歲又無工作，（遠征求診）好正常。

新醫院暫無通宵急症服務　街坊仍需跨區求醫

規劃署推算天水圍區內65歲以上長者人口將由2014年的25,800人增至2024年的48,600人，相信區內醫療需求未來仍有增無減。新醫院現今只提供部分「朝九晚五」的專科服務如內科及老人科、骨科等，翁婆婆希望醫院可盡快提供24小時急症及眼科服務：「好似便利店咁，開24小時，夜媽媽有事搭的士去到唔會摸門釘。」翁婆婆想要的醫院，是「就腳」、24小時運作且服務多元，像社區中的便利店，可以隨時求診。

不過新醫院急症室將於3月15日才投入服務，且只在上午8時開放至下午4時，目前為止尚未訂明什麼時候才有24小時急症服務；現時天水圍街坊要睇夜間急症，仍需跨區到屯門醫院或博愛醫院。由街坊及社工組成的「天水圍醫療關注組」在去年12月尾以網上及街頭問卷進行抽樣調查，訪問205位區內居民，當中近九成街坊認為8小時日間急症服務並不足夠，八成三人希望醫院可提供24小時急症服務。關注組希望醫院清楚指出何時提供通宵急症室，並提供牙科及中醫服務。