【無障礙食肆．二】坐輪椅都可以「食好西」　女生：基本權利嚟

與友人一同尋找「隱世」餐廳，品嚐「極邪惡」美食再拍照放到網上，這看似平常不過的事，卻因為一些「門檻」很高的「高級」食肆，對於輪椅人士來說是種奢侈。「高級」，指的是坊間食店門前常常都高了一級，而且內部設計和整體態度都不歡迎輪椅人士，令他們對於食肆的要求，只停留於「入到去就算」。
90後女生何宛淇，是香港的硬地滾球傷殘運動員，兩年前她特意開設專頁，「揸住輪椅」四出推介好吃又無障礙的餐廳，當中困難不少，但她說這樣做只有一個原因：「我真係好鐘意食嘢！」
攝影：林若勤

「覺得呢方面嘅資訊喺香港比較少，咁自己都係坐輪椅嘅，本身又為食，所以都想可以出一分力。」因患脊髓肌肉萎縮症要以輪椅代步的宛淇，自小已很喜歡吃東西，但平日出門「搵食」，總會遇到不少困難。她表示，自中學時期已有為輪椅人士搜集食肆的想法，直至兩年前終於付諸行動，開設 Facebook專頁「揸住輪椅·食勻香港」，「身邊都有好多輪椅朋友，傾偈時都會話想試一啲餐廳，但係又會擔心唔知點去、去唔去到，所以我都想做多少少。」眼見輪椅使用者因為不了解、怕麻煩別人而被剝奪「食好西」的機會，宛淇希望透過專頁，為他們提供多些資訊，介紹一些相對上是輪椅友善的餐廳。

從她的專頁可見，平日她去的餐廳遍及不同類型，中、西、意、日等皆有，就如很多女生一樣，食物賣相、味道是宛淇選擇餐廳的準則之一，「我搵餐廳都係好隨意，同朋友經過邊度，見到好似好食喎，咁就會入去；或者碌到Facebook見到好似好正嘅，咁又會去試㗎啦。」不過，坐着輪椅出門，始終不能沒有計劃，「都會要諗嗰間餐廳方唔方便、有咩交通去到，另外就係有冇梯級、有冇升降機等等，之後先再會諗，同行有幾多輪椅朋友、需要嘅空間大唔大。」短短兩年，她已去過港九新界，甚至是離島區的餐廳，更有不少食評「存貨」是排着未寫的。

在不斷探索之下，宛淇發現，其實香港還是有有心的食肆店主，「有一間好深刻嘅，係十年前喺花園街嘅一間麵店。當時我行勻晒成條街，冇一間餐廳我去得到、食得到，我又肚餓又趕時間，好彩畀我遇到老闆娘。」當時麵店老闆娘見到宛淇在附近徘徊良久，知道因為該處食肆全都是地舖，門前都有梯級，而宛淇樣子又十分焦急，於是主動詢問：「不如我開張枱，畀你喺門口食啦。」簡單的一碗魚蛋粉，已令宛淇十分感動，而雖然只是坐在門外，但老闆娘又補上一句：「慢慢食啦，就算食環署嚟到要告我，我都唔怕。」她認為，在大家都對輪椅人士「耍手擰頭」的情況下，仍有人不怕麻煩伸手相助，是十分難得，而這份同理心，相比任何硬件設施，更是令食肆可達至「無障礙」的關鍵。

「我覺得任何人，無論你係身體有冇障礙，食嘢根本就係唔可以局限嘅。民以食為天丫嘛，享受食物係基本權利嚟。」

宛淇現時是全職硬地滾球運動員，過去曾多次代表港隊出戰，在剛過去的亞洲殘疾人運動會，她取得了一金一銅的佳績。別看她現在好像硬朗又樂觀，其實她也曾因行動不便和患病而灰心氣餒。「有一段時間，因為免疫力好差，係每年都至少要入一次ICU…...嗰陣會覺得點解要咁辛苦？」她曾因此質疑自己的生存價值和意義，但後來漸漸明白，坐輪椅並不等於失去全部自由，「我做唔到嘅事係有一部分，但我做到嘅都有好多，唔應該因為有少少局限，而抹殺自己都有能力影響身邊嘅人。」未來她將會加緊練習，希望可以出戰奧運並取得佳績，同時會在空閒時間繼續「食勻香港」，令更多輪椅使用者都可以放膽走出來。