樹仁中文系必修國語　限時背千字文：老師話講普通話先係人上人

浸會大學近日再次因必修普通話科的畢業要求，掀起「普粵」風波。另一邊廂，原來樹仁大學的「普通話科」亦是一門令學生聞風喪膽，猶如煉獄的科目。樹仁大學曾經有7個學系必修普通話科，由2018至2019學年起，只有中國語言文學系同學必需修讀，未能取得D級成績必需重修。
在樹仁大學中文系畢業7年的Issac，回想起當年「急口令背書」等地獄式普通話訓練，他說：「你諗吓我到現在都仲記得，就知道當年普通話科幾變態。」原本自少肥胖的他，甚至大壓力至游水減壓，半年來減去60磅。一個「b、p、m、f」的語文課，為何如此可怕？

迎新營已風聞「變態」普誦話老師

樹仁普通話課是以國家語委普通話水平測試為基要，而其中一位普通話科導師，學生稱之為「『鵝』姐」亦是水平測試評審之一，「總之讀中文系的同學，冇可能避開佢。」，「基本上入O-camp嘅時候，師兄師姐已經提醒我哋要小心鵝姐嘅普通話堂，大家敬而遠之。」在網上搜尋「樹仁 普通話」關鍵詞，討論區已有鵝姐令人聞風喪膽的教學方法；在Facebook樹仁大學的Secret group，亦有「有冇人想鵝姐唔存在？」的帖文。Issac憶述鵝姐在課堂上花大量時間要求同學背誦數百至千字的範文，「變態在佢會計時，分半鐘要你背晒出嚟，好似急口令咁。」

抄寫海量字詞拼音

中文系同學須於Year 1及2分別修讀初級及進階課程，「每個課程只係1個學分，功課量卻係3個學分課程的數量。」鵝姐功課之中，最經典的是「我哋有本水平測試課本，入面嘅字詞係根據聲母分類排列的。鵝姐要求我哋根據部首，重新抄寫出來。」意即是將聲母分類，變成部首分類，海量字詞連拼音一同抄寫，難度猶如整理亂碼。「其實邊夠時間做，結果好多同學都靜雞雞喺其他老師嘅堂上做，結果俾老師發現，又傳到鵝姐的耳裏。」

「學唔好普通話賺唔到錢」

Issac下一屆的學妹Susan，斬釘截鐵地說：「我可以講一無所得。」她說每次上2節課堂，老師花上一節課堂述說學習普通話的好處，洗腦式灌輸「講普通話就係人上人」、「普通話就係你哋一切，要同大陸接軌。」、「學唔好普通話將來就賺唔到錢。」、「回歸之後，所有人都要學普通話。」、「普通話比任何語言都更重要。」；亦有另一位08年同系畢業的黃先生，記得老師曾言：「冇普通話就乞米，大陸文化同資本會全面進入香港，到時一定要有水平試資格先揾到食。」等等以國語凌駕一切的思想。

Susan依稀記得有同學問過為何中文系學生必修普通話科，甚至被要求達到進階程度的水平。老師解釋中文系不少老師是內地人、不少中文系同學畢業後當教師，其中一環要考核普通話能力。在樹仁大學中國語文學系的網頁上，更有邀請在國家語委水平測試考到優異成績的畢業生，以短片分享「學習普通話的好處」，內容大概是普通話如何有利事業發展云云。

Issac及Susan均記得鵝姐其一名言：「有個師姐普通話好，𠵱家喺鳳凰台做主播，有一個教普通話賺好多錢。如果唔識普通話，就只可以做幼稚園老師，跪喺地下同小朋友玩。」Susan說老師將語言學習變得功利，「仲會好鼓勵每一個學生考國家語委普通話水平測試，出到嚟可以揾一份好工。」她還聽說，鵝姐會額外開班「國家語委普通話水平測試補課班」，不過就非強制性，同學可自由付費報名參與。黃先生亦指該老師「以成績威脅同學報補課班。話唔讀分數會低。當時筆試只佔總分少部份，上堂、口試分任佢畀，無得check分。」

學生游水減壓

平日課上過半時間只是朗讀和背誦，普通話科考試卻考驗拼音、聲母韻母等知識，「課堂上鮮有提及，根本就唔識。」Susan說，是後來由另一個老師來補課時才學懂。Issac當年第一個學期修讀進階普通話科不及格，「嗰刻真係崩潰！」然後每天游泳十幾個塘減壓，想不到從小到大被稱「死肥仔」而自卑的男生，因着一個普通話科，史無前例成功減去人生第一個60磅。

學生為求畢業不敢挑戰強權

中文系學生為求及格，更傳出不少笑話。「下學期，我每堂坐前排，佢話坐前排係勤力學生，等佢注意到我。」師兄亦早已叫男同學提防，有傳鵝姐特別鍾愛男學生，結果每堂課矜貴的男生「被女圍」，「好似九宮格咁，男仔坐中間，前後左右都係女仔，咁樣老師先會注意到佢哋。」鵝姐不許學生上課穿短裙、短褲、涼鞋，女同學一律遵從；「亦有傳鵝姐特別喜歡穿紅色，同學們都不敢穿紅與其爭妍鬥麗，其威嚴有如古代無人可穿皇袍的金黃色。黃先生：「佢真係當自己係皇帝。」

浸大學生要求取消以普通話能力作為畢業要求，並批評學校的豁免試難度過高、評審制度欠透明等問題。樹仁畢業的黃先生對此感同身受。當年他刻意只答半份試卷作無聲抗議，「又唔計GPA，合格就得。我做咗一半，計過晒分合格，就趴喺度休息。」豈料老師收卷後卻揚言「話我唔認真讀佢𠵱科，好有機會要重讀」，黃以口試、筆試以及出席率合格抗辯，「佢話口試背得晒唔代表會合格。」，「我驚佢改我之前分數，要求畀分我睇，佢唔肯。」

樹仁大學中文系學生可曾就老師教學向校方反映？「冇用。鵝姐的地位是不可動搖。不及格就畢唔到業。冇人會挑戰佢，師兄師姐都教路，捱過去畢到業就算。」Susan說，如今她和Issac已跨過苦海，投身社會，工作數年卻仍未有體會當年老師所演，普通話能力如何跟工作機會成掛鈎。現在Susan也投身教育行列，「其實好少用到普通話。我覺得學習普通話係好，但我唔認同係必修科。」

綜觀目前九間大學，只有浸大規定學生必須修讀普通話課程；港大、中大和城大等都沒有特別列明學生必須畢業前普通話達標；教育大學、理工大學，規定學生必須修讀有以普通話授課的中文課程。