【搵食難】天后米芝蓮食店　26蚊「街坊恩物」隱藏招牌菜竟是⋯？

獲米芝蓮推介的天后華姐清湯腩，除了以肥瘦相間的牛腩麵打響名堂，每逢食飯時間必定座無虛席，大排長龍，吸引蔡瀾、上班族、學生、「三行佬」，還有遊客慕名而來。然而，一碗牛腩麵40多元，很多學生哥可望而不可「吃」。
原來，店裏竟有一道平價的「招牌名菜」，卻沒有寫進餐牌裏。

隱藏蘿蔔菜飯

從一位北角庇理羅士女子中學的舊生打聽，華姐有一道學生尊享的「隱藏」名菜「蘿蔔菜飯」。記者遂到訪華姐的店，不看餐牌，膽粗粗下單：「蘿蔔菜飯吖唔該。」老闆華Dee聽罷，仿佛聽見久違了的鄉音，又像驚訝記者能說出店的暗號一般，他喜上眉梢，單刀直入問道：「嘩，你幾時㗎？」他大概誤以為記者是這區學校的舊生。這碗蘿蔔菜飯價值僅26元，比餐牌上的其他菜式幾乎平一半，還加送細豆漿，「淨係庇理羅士先知添啊！係班衰妹先叫。」華姐的兒子華Dee說。

華Dee談起「蘿蔔菜飯」的源起。2003年華姐清湯腩開張，要知創辦人華姐在「牛腩」界出名老實人，其湯底以大量的肉熬煮，濃香卻清澈如泉，一勺湯勝過一道菜。華姐早已構思好一道「菜飯加汁」做學生餐，盛惠11元。「華姐好錫啲學生。我老媽子不嬲都係咁㗎啦，啲細路嚟到，就叫阿仔埋去坐。咁鍾意細路，啲靚仔落嚟食嘢未減下價畀佢，又唔收外賣囉。」07年以後，菜飯加汁，也添了蘿蔔。學生也尊享9折，不收外賣錢，加送細豆漿，華Dee：「執（賺）微啲囉，有咩所謂啊。」

這道平民菜式更是庇理羅士學生「尊屬」，鄰校皇仁仔雖是華姐常客，卻非蘿蔔菜飯的擁躉，華Dee就笑說：「佢哋冇你哋咁知慳識儉啊，起碼都食返個......魚蛋河啦！」華Dee起初來的時候，魚蛋河也才20多元。

曾是最平的學生餐

庇理羅士女子中學的舊生Jane憶述2010年的蘿蔔菜飯只需要14元，當時常點這道「名菜」因其又平又好味。另一舊生劉小姐補充，「差不多是區內最平的午餐，更平的就只有杯麵和光顧小食部的燒賣、魚蛋。」畢業數年後重遊舊地，華Dee談起昔日的回憶：「個個都要加汁，加晒我啲牛腩汁！」Jane豎起手指公說正，華Dee就說：「正 ？ 仲係度講！點啊而家讀咩啊你。」華Dee其實認不出舊生，只是「庇理羅士」對其而言是一個情意結。

臨時臨急要55個菜飯加汁

華Dee記得，有次早上11時多，接到來自庇理羅士學生的電話：「佢哋嗰班人簡直係離晒譜，打個電話落嚟話，我哋要55個菜飯加汁。我話，你唔好落嚟住啊大佬。煲返成煲飯比佢哋先得！」平時保溫的小電飯煲內的飯不夠，他們立刻用上大電飯煲，特地煲飯給這班學生。

堂食蘿蔔菜飯會被「鬧」

其實，華Dee對待學生甚少温柔，尤其午飯的時候，「心情好時，會問你係咪放學？心情唔好時，就會話又叫蘿蔔菜飯啊？下次唔好再叫蘿蔔菜飯！」劉小姐笑說。華Dee：「有時你班傻妹入嚟，掗我個位，仲話要蘿蔔菜飯。我話，打死你啊！唔帶走，仲要係度食。」因此，學生吃特價飯通常都會外賣。 「係啊，如果堂食會俾人鬧，叫我地好心加碟菜喇。」Jane說。每當華Dee鬧人時，她和同學就「醒水」：「佢嬲，好暴躁，要快啲走。」

學生知道華Dee心裏其實好痛錫學生，有些舊生畢業多年後，仍會特地回去食碗麵、華Dee：「有啲畢咗業，皇仁嗰啲帶埋女朋友過嚟啊。有啲結埋婚、帶埋仔女過嚟都試過。」

近年區內多學生優惠選擇、學生多飯錢

現在學生富起來了，附近餐廳學生優惠選擇亦比從前多「近幾年啲妹妹仔有錢啊。放學你去Starbucks睇下幾多學生去買嘢，咩Frappuccino，40幾蚊杯啊大佬。」現在來買飯的學生也有些會點40多元的牛腩河。

華Dee還有點「多管閒事」，同一條街早前有家拉麵店，平均60一碗麵，華Dee閒時過去傾偈，也提議他們增設學生優惠：「我話你咁嘅價錢，啲學生食唔起㗎大佬。」

提議隔離舖齊齊畀學生優惠

4、5年前的午飯時段，華姐清湯腩門外仍會看到學生排隊買飯的景象，此情此景不再，蘿蔔菜飯像被冷落的妃子。因此，當記者點叫蘿蔔菜飯，即是非舊生，華Dee仍熱情招待，一道「蘿蔔菜飯」又再讓他想念那段熱鬧的日子。