【來稿】青衣半山人的悲哀：無通宵小巴做唔到夜鬼　註定無朋友

眾所周知，啲人約gathering，除非你大部分朋友住喺港島所以約銅鑼灣，如果唔係，一班人入面就算有大西北人、有新界東人、有九龍東西人、有港島人，gathering地點最終都係會揀係旺角或尖沙咀，因為大部分地區都有通宵紅VAN可以返到屋企。
但對某部分人嚟講，每當臨近12點，我哋開始睇錶做人，當大家玩到興起、吹水吹到重點嘅時候，我就同自已講，聽埋呢句我就走喇。初相識嘅朋友心諗，你灰姑娘呀，十二點前要返到屋企呀？咁係因為佢哋唔知道究竟miss咗尾班巴士有幾慘（你有錢搭的士除外）……
撰文：青衣半山人

青衣好細？地鐵站行返去要40分鐘

好多人以為，青衣好細，以為去到青衣＝到咗屋企，唔知道青衣都分好多區。介紹返，青衣島面積係大過成個灣仔區、差唔多一個觀塘區咁大，而觀塘成個區有五個地鐵站，青衣得一個。青衣係住咗成廿萬人，都多過成個灣仔區。

青衣周圍都係山，地勢忽高忽低，只有近海旁嗰邊比較多平地，好彩嘅，住近地鐵站邊嘅長發長安邨，唔單只可以由地鐵站行過去，有啲單位仲對正海景，都咪話唔係公屋中嘅豪宅。住喺翠怡宏福，行過去都係十零廿分鐘。唔好彩嘅，住青衣老邨長康長青，或「青衣半山」長亨長宏邨，去到青衣站都係要轉巴士或者小巴先返到屋企。而我就係住喺「青衣半山」最高嘅長宏邨啦。平時由青衣站到條邨車程都只係10分鐘。一到半夜12點50分後，當啲人miss咗尾班巴士，就會全世界衝去排的士，試過條隊有廿幾人，但的士得嗰幾架，等咗半粒鐘先有車……俾我唞吓得唔得呀……

試過有人問我可唔可以喺地鐵站行返屋企……冇話唔得嘅，Google就話要40分鐘囉。雖然我都係鍾意行路嘅人，但過完長安邨後，接駁半山嗰幾條担桿山路、楓樹窩路同青衣西路，根本只係預比車行，你真係要行嘅話，就要穿過隧道，喺乜都冇（有斜坡、草、油站）嘅公路旁行10分鐘，先去到長亨邨嘅山腳，如果住正長亨高處或長宏邨，我就真係恭喜你啦，因為要再用你十零分鐘先爬到上山返到屋企。呢條路，平時搭車經過，通常人影都冇隻，偶爾先會見到跑步友一身運動裝束經過。條路斜斜哋，都幾train到體能我諗。但如果你係一個女仔，夜媽媽一個人喺呢條路行，都咪話唔驚。仲要係凌晨，本身都有啲眼訓，行完即刻精神番。

冇通宵小巴　焗捱「青衣一夜遊」57站通宵巴

然後你會諗，乜青衣冇紅VAN咩？SORRY，青衣係紅VAN禁區。綠VAN呢？青衣得一架通宵小巴，喺荃灣開嘅。當你喺尖沙咀或旺角返返屋企，就只有一個選擇：N241。呢架巴士，我會形容為雞肋。讀大學嗰時我都搭過幾次，無錯佢係返到我屋企樓下，但係佢過完彌敦道、長沙灣道後，仲要兜埋荔景、葵芳，先入青衣。第一次搭時入到青衣，天真的我以為屋企在望，點知佢喺青衣兜咗足足14個站！九巴將日頭幾條線合成做一條，兜勻10個屋苑，兜完青衣南面嘅長青美景長康，仲要兜去中部青衣邨，再去埋北面嘅長發長安，先返返轉頭上返山去長亨長宏（總站），俾張圖你睇，會發現路線係「弓」字再加「人」字，真係九曲十三彎……當東涌同返天水圍嘅朋友已返到屋企時，我可能都未開始上山。明明平時出旺角都係半個鐘多啲，通宵竟然係一個DOUBLE，一個鐘。等車隨時等成25分鐘，根本就係懲罰夜返嘅人。

仲有唔知點解，可能係新車關係，架N車啲燈光光過平時啲車好多，有啲司機會好心熄燈，有人落車先開返，但有啲就全程都開燈，仲光過SOGO LED大MON，真係想瞓陣都難。

九巴可能會話，你得咁少客，我點開兩條線呀！但你而家條線咁，趕走唔少客啦，好難靠呢個數去預計開多條線分流會冇人搭喎。其實小巴最靈活，可惜而家冇小巴由旺角入青衣，點解會咁嘅？

11月頭，我發現九巴開咗架N41X，聲稱係特快線，仲因為咁而減少咗N241班次，但睇番，原來N41X得兩班（12:45同01:00）……真係多謝老細。

泥鯭的　想快返家的另類選擇？

有人會話，有泥鯭的你唔搭！作為一個新界長大的村姑，我從來都唔知泥鯭的係點work／喺邊搭，亦驚會同啲陌生叔伯同車，同埋始終非法。不過，聽聞唔少青衣人都會揀泥鯭的，15分鐘返到屋企，但就貴啲。其實如果深宵交通做得好，泥鯭的邊會有生意呀。為咗避免折磨的「青衣一夜遊」，我已經漸漸成為一個唔會夜歸嘅人，註定無朋友。

睇完呢篇文，可能你心諗：你估得青衣係咁咩？大西北／北區／XX都係咁啦！歡迎一齊討論。或者你都漸漸因為深宵交通唔方便，一早習慣咗趕尾班車返屋企，又或者你因為總係早退，冇咩朋友會搵你，所以冇呢個問題……或者你會話，早啲返使死咩？咁深夜先收工嘅人點算呢？香港出名係個不夜城，好多人都要深夜先放工，唔知有幾多基層就係因為咁日日冇咗一個鐘休息時間，或者因為交通咁不便而放棄某啲工作……