【喪屍家庭·多圖】三人父女檔扮喪屍 家貧小女兒養蟑螂做知己
「Hello，大家好，我係Ivy姐，我係一個中二學生，我真正的身份係一隻喪屍。我8歲就蒲蘭桂芳。好多人同我影相，感覺好似明星咁。」Zombie Paradise 成員Ivy自我介紹。她8歲的時候和家姐嚷著爸爸萬聖節帶她們到蘭桂坊觀摩，爸爸阿沖：「佢一句戲言，我為佢哋做到最好，想佢哋知做任何事，連玩都要認真。」他們仨一起自研喪屍妝效和演技，去年加入Zombie Paradise 喪屍家族，從此一家人踏上成屍之路。
攝影：梁碧玲
在喪屍家族裏面，Ivy好像在一堆「大人」中的小鸚鵡，整天吱吱喳喳，學著「大人」刁嘴的口吻。但她說：「細個我冇乜朋友，得閒咪同呢度啲大人講吓我的心事。」
家貧養蟑螂做寵物 成傾心知己
這個女孩除了母親，天不怕地不怕，兒時知己是蟑螂。蟑螂有名字的---小強1號。Ivy說：「細個屋企好窮，但好想養寵物，就養蟑螂同螞蟻。」她說家姐比她年長一歲，家姐出生的時候，家裏是豆腐撈飯，她出世後家裏經濟稍有改善，便雞翼撈飯，「但每天都得一個餸，連菜都冇。」所以，她知道自己窮，養寵物，就從家裏捕捉。她與家姐找一個箱子做蟑螂屋，把自己喜歡的糖果放進去。放學回家便抱牠出來，放在手背上讓牠爬來爬去。「有時候我都會同蟑螂傾心事。學校發生啲乜嘢，我都會同佢講。」
作文寫家中小強 老師彈回文章
「其實我小學嘅時候好內向，唔講嘢，冇乜朋友。可能我同佢哋唔啱傾，佢哋有少少孤立我。」Ivy訴說，小學三年級的同學的腦袋還是混混沌沌，「媽媽叫佢做乜就做，媽咪話要去補習，就去補習。我反而冇共鳴。」爸爸說加以她患有鼻敏感，整天都在「包餛飩」，同學自然疏遠。「但我小三我就有目標，同爸爸講想學溜冰，我希望18歲考獲7級，20歲考取教練牌。如果我冇目標，我就覺得自己生活好迷失。」小學同學未會談目標，唯有蟑螂是她知己。她為小強在校裏寫過一篇文章：「我最愛的寵物是小強，很多女生也害怕小強，但是我也不害怕。我反而更愛牠的美美的觸鬚，牠有很多腳很方便，可以爬牆，可以爬天花板。」老師卻彈回文章，跟她說：「女仔寫咩蟑螂，男仔就話啫，寫返貓貓狗狗。」
父親：佢嘅選擇，點解唔比？
沖爸爸說：「佢嘅選擇，點解唔比？」記者讚賞她把兩個女兒教得好懂事，他說：「佢哋細個我已經當佢哋係大人。大人同細路最大的分別，就係有冇選擇。」兩個女兒小學時期接過學校不少的投訴。家姐自小喜歡打扮像男孩，不喜歡穿褲子，頭髮剷青。學校打電話給他有些微言，沖爸霸氣回應：「冇嘢㗎！都剪咗！」；Ivy在校閱讀一些有關政治抗爭的書，校方致電家長反映，他依然覺得這是女兒的選擇。
不因窮苦而自卑：錢，換取我的自由
Ivy的談吐，怎樣聽也不像一個中二學生口裏說出的話。記者直截了當，問：「你可曾想過為什麼家裏窮？」她回答說：「沒有。我屋企比較開通，比我好多自由。我反而覺得係錢，換取我的自由，唔會因為冇錢而自卑。」她反而怕長大成人，有錢了，反而失去自由。「我鍾意做咩都得，我細個佢哋又比我自己出街。」她甚至說，爸爸是地盤工人，「我依然可以好豪咁話，我爸爸做搭棚。因為呢樣嘢係佢自己想做，而唔係因為生活所逼，佢想試嘅一樣嘢。」她從父身上也學會選擇。
加入喪屍家族 盼女兒學做事認真
「我爸爸佢係一個玩得好開，但工作嘅時候係好嚴厲的一個人。」Ivy說。有次她換了一對新溜冰鞋，做不到某些原本做得到的動作，沖爸特訓Ivy，試三次，失敗要跑圈再試，「訓練我去一個極點，我有喊，但最㚵做到了。」沖爸爸認為即使是玩，都要認真，因為這都是一個人的選擇。父女檔三人一起加入Zombie Paradise，沖爸：「玩都要做到最好，平時父母講，啲女感覺唔到咩叫認真啲，不如讓佢哋參與其中。」Ivy：「其實做喪屍好辛苦，好熱，化妝化幾粒鐘，唔係好似其他人覺得咁容易，好似明星咁，啲錢好易賺。」她說爸爸做事認真起來，就會皺眉，尤其做道具、服飾的時候，「要經過舊化、噴血、磨爛， 一件衫都好多嘢做，何況咁多人嘅衫。」
女兒：「本身好崇拜爸爸，想同佢一齊玩zombie。」
更重要是，Ivy說加入Zombie Paradise 是出於對父親的崇拜，「我覺得爸爸係一個好努力的人，好似玩喪屍咁，人哋冇吩咐佢，佢都會先揾資料，即刻畀人，我覺得佢好似乜都知咁。」又，「起初見到爸爸畫𠝹手的傷口唔識，到現在做到一個咁大的傷口，就算只係隔籬望到，都覺得佢好叻。我本身好崇拜爸爸，所以想同佢一齊玩喪屍。」她未學會化妝，做道具，但即使九月要準備溜冰比賽，又忙著大考，她依然抽時間參與其中，「佢哋需要練習化妝，我就做佢哋嘅模特兒，叫幫吓佢哋，因為我都係大家嘅一份子。」
Ivy說溜冰是她的目標，但加入喪屍家族的意義是，唯一一個讓她輕鬆的地方。她說自從變成一隻喪屍後，人變得外向開朗，「因為做喪屍逼住你要主動去嚇人。」她甚至大爆大家姐性格更內向，「連去麥當勞買餐都唔敢。」但沖爸爸說兩女一上喪屍妝，「真係好似上咗身咁。」