迷失青年歸隱新界開茶室 引來「古人」同好：最好朋友是老子
在上水的蕉徑村有一間白色小屋，這是一處讓人感受寧靜淡泊的茶室——白院子。這裡無事可做，貼上告示霸氣列明要求來人放下電子產品，建議不談是非，謝絕心術不正、濃妝豔抹的生物，白院子只供客人嚐茶，以及畫一幅理想生活的藍圖。走進鳥語花香的院子，還以為會走來一位盤髻，身穿長袍的中年古人，誰知主人卻只有27歲。
攝影：顏寧
院子主人有一個英文名字Javis。與他Whatsapp，卻像接通了地府，他一直謙稱自己是「不才」。這位「不才」，五臟六腑徹頭徹尾是一個古人。他最愛老子演繹大自然運作的思想，問他如何傳釋大自然之道，他回答：「我都係用返我老友老子嘅說話......」他的信仰是孟子的「仰不愧於天，俯不怍於人」，意謂做人要坦蕩蕩。「不才」說話語速慢，談到想法時輕易地旁徵博引，左一句「上善若水」，右一句「致虛極，守靜篤。」大概是不爭名利，歸根曰靜的思想。少一點墨水，難以溝通。
他每天6時起床，日花最少1小時閱讀，最近在讀《生活的藝術》、《周易講疏》和《莊子諵譁》。一周有3、4天下田耕作，近來還在上易經和文字學的課程。「不才」不是生來就追求寧靜淡泊：「我諗我係由極端失落開始......」
留級四次的反叛青春
Javis生於基層的單親家庭，中五後沒有再升學。中學別人讀五年，他卻是讀了九年。留給四次不是因為成績差，而是因操行問題。他自少被標籤反叛，只是喜歡質疑的「問題青年」。與老師辯駁，每每被校方罰停課，他不明白停課的意思何在，不知死活還繼續向訓導「挑機」：「犯規一係就係懲罰，一係就係教化。停課，懲罰嘅位喺邊度？或者能夠改進我嘅地方喺邊度？我唔使上課唔係仲更加高興咩？」學校在Javis眼裡就如監獄：「如果你係有心教法嘅人，點會睇我唔順眼？」
家境清貧日日蒲圖書館 與古人為友
中五畢業，下午補習幫補家計，每天早上到圖書館重拾閱讀的興趣，甚麼範疇的書都會拿來看，包括建築、設計、文學等。讀到孔孟莊老的儒道思想，認識朱光潛、林語堂等作家，才情歸中國文化，漸漸走上古人之路。他閒會與友人唱K打波，卻甚少主動向身邊人提起有一條與古人神交的「頻道」，笑說：「你無啦啦同個差唔多年紀嘅人講，上善若水。佢會講，做咩呀你，無病呀嘛？」Javis視古代思想家、美學家為朋友，不是一種文學的比喻：「我諗都有啲寂寞嘅，不過唔係負面嘅感受。有句話叫尚友古人，咪好似遇到自己嘅知己咁。」
感工作無意義 「其實我做緊啲咩？」
每天在圖書館與古人對話，開始反省吾身：「究竟我喺世界係應該要做咩？點解我會喺𠵱個世界度？到底咩係重要？」在補習社工作的日子，面對學生家庭疑難有感愛莫能助，又發現補習的工作其實沒有什麼益處：「因為時間嘅關係，啲功課都係我幫佢做。咁就無意思，所以就唔做。」離開補習社，又到農業科技公司工作，卻又再一次失望：「水耕設備真係好高科技，但係慢慢去做嘅時候，就發現𠵱個唔係答案， 因為唔符合『道』，大自然之道。」他不明白為何要在泥土上興建石屎的水耕設備，「日日返工打卡，好似無咩意思、好無聊， 其實我做緊啲咩？」日復日上班，Javis心中帶著無數的疑問。
大病逼使面對心中疑問
忙忙忙，每天工作消耗腦力，有時放假也要工作：「有時會覺得自己無靈魂，咁樣唔係我想要嘅生活。」大約在兩年前，Javis的身體開始出現嚴重的皮膚敏感，身上各處出紅疹。這場病就如催化劑，逼使Javis要面對出來工作六年間的疑問：「嗰陣就會諗生死。其實無人知自己幾時死，𠵱個亦係事實。可能啲人會諗做到40、50歲，有車有樓先搵自己嘅理想啦。你20歲死唔得㗎？你50歲嘅時候有心都無力，𠵱個都係事實。」就這樣，Javis決定不理後果，一邊帶病上班，一邊開始籌備白院子。
在朋友介紹之下，Javis找到蕉徑村這片地方：「經過高爾夫球場，左右就係大樹，好似一個隧道，跟住入嚟就係小徑，好開闊 。其實就係桃花源嘅故仔。」五個月前，白院子就開張了，希望社區中有一個靜的空間，讓人腦袋去喘息，畢竟社會紛亂，生活忙碌，過於繁囂耳根難以清靜。Javis辭職後，身上的紅疹也逐漸消退。
遇見「稀有生物」傾君子之風 60歲最啱傾
古人之路原來不孤獨，白院子為Javie引來更多志同道合的知己，無需像李白邀月共飲。以前放工、食飯，Javis與朋友的話題也是隨便說笑：「係隔離搭下嗲，諗返起唔知自己講過咩。即係大家講吓去邊度食嘢、有咩優惠。諗起都頭痛。」Javis笑言，最近發現自己和年約60歲的朋友最投契：「有啲係易經班嘅同學，有啲就藤㨢瓜瓜㨢藤，例如啊邊個老竇都好𠵱啲嘢，一齊飲茶就變咗朋友。」最近他亦認識了同樣像古人的年輕香藝師，也認識了家裡三代種中國蘭的朋友：「第一次見啲稀有生物，傾君子之風，好開心，好啱傾。」
從前，Javis不會主動跟人聊起自己的想法；現在，白院子就成為了傳遞這些想法的空間；院內牆上貼了陳湛銓的《霸儒》，旁邊放著朋友種的鐵骨（中國蘭品種）：「如果你覺得𠵱啲係好嘅諗法就要同人講，未必直接講，係透過空間去講。」