【玻璃幕牆危機】林超英：打風易扯甩　建築師：碎片冇稜角只會痛

十號風球「天鴿」把中環恆生總行40塊玻璃幕牆吹落，同時讓人憶起1999年十號風球「約克」吹襲香港，使灣仔稅務大樓、入境事務大樓等多幢政府建築物共有400多塊玻璃被吹毀，文件滿天飛。現時全港共有二萬多幢使用玻璃幕牆的建築物，天文台前台長林超英指現今的建築物窗戶設計錯誤，鋁窗難以扣得穩，遇上強風時容易被吹走、破爛，而大幅玻璃更為危險，他說：「大廈愈起愈高，始終擔心，再有如溫黛來襲，窗出事，我們可以走去哪裡？」下一個颱風將至，又會否帶來另一場「玻璃雨」？

鋁窗不及那些年的鋼窗可「卡住」

林超英指現時鋁窗出現一個基本的設計錯誤，更不及從前的鋼窗。「以前鋼窗有一長柄有幾個窿可以卡住個窗。現在鋁窗好多時一大風會被扯開，好多住客要用繩綁住，這個好明顯有問題啦！鋁不是硬的物料，大風的話可以成個窗『扯甩』。」況且現代樓宇鋁窗欠氣窗設計，打風時要關閉窗戶，「你唔能夠假設所有人屋企都有冷氣！」

地產商用落地玻璃為減成本

說起私人屋宇的落地玻璃及商廈的玻璃幕牆，林超英更為動氣及擔憂。他指：「香港已經無厘頭咁熱，落地玻璃窗唔適合香港，温室效應會令氣温更加熱。」更重要是落地玻璃窗玻璃面積越大，在強風中「又吸又壓」，受壓比細幅玻璃窗更大，「地產商成日宣揚落地玻璃好有型，其實就係想降低建築成本，成塊玻璃嵌埋去就搞掂，唔使砌磚，成幢樓宇都係落地玻璃輕咗好多，減少負重，結構上可以減料。」

陣風吸力是無法想像

「天鴿呢個風澳門比香港強好多，所以我哋唔應該笑人哋豪宅飛甩晒啲窗。」憶起99年「約克」颱風，灣仔數百隻窗飛甩，林超英當時仍是天文台台長，「嗰件事夠晒經典，但我唔驚訝，甚至是預期之中。因為我哋好明白有時啲風會喺角落位，或者陣風製造的吸力是無法想像，不能掉以輕心。」他又指是次「天鴿」期間，發生恒生銀行飛甩窗事件值得擔憂：「恆生是一間穩健的銀行，起的樓都應該好穩健，一個颱風都飛甩窗，住宅更應該擔心。」雖然恆生銀行只是個別事件，但他不明白何以香港會發生玻璃飛出街的事，竟然不多人感憂慮。

建築師：玻璃擊中都只會痛

香港建築師學會會長陳沐文卻說：「我都唔知點解啲人會咁擔心。我自己唔係好擔心香港，維修算係做得唔錯。」玻璃幕牆使用的玻璃，是鋼化玻璃，透過化學及物理的方法，增強玻璃本身的抗風壓性，其抗衝擊力的強度是普通玻璃的3至5倍。陳沐文指，鋼化玻璃最大特點是即使爆裂，也會變成無銳角的小碎片，即使墜落擊中途人，「最多都係會痛。」他多番強調玻璃幕牆爆裂鬆脫只是個別事件，「微不足道」，鋼化玻璃約有2至3%自爆率，陳解釋鋼化玻璃中含有雜質，有機會自爆，但是玻璃進行安檢測試時，已能將有缺憾的玻璃篩走。

然而，林超英反駁：「問題唔係個玻璃易唔易碎，而係成幅玻璃被扯出去。你試吓畀佢扑中啊！如果佢好似棉花咁輕我就冇嘢講！」

玻璃窗100%檢測

陳沐文又指香港有關玻璃幕牆的審批制度已經非常完善。屋宇署指鋼化玻璃檢測程序是採取英國標準。「你知唔知啲玻璃窗係由業界專業人士負責制，我哋仲緊張過啲屋宇署。」屋宇署舊有制度要求註冊結構工程師委托一名監工，監督工作須涵蓋工程所使用的鋼化玻璃板的最少 30%，「但十幾年前已經唔再抽樣檢測，要100%測試，所以質量上一定有保證。」他指玻璃幕牆鬆脫或爆裂有很多因素導致，如玻璃被硬物撃中、黏著劑、膠老化，「有可能年紀大，保養得唔好。」

舊式玻璃幕牆「只係外觀上冇咁豐富」

香港自80年代已普遍採用玻璃幕牆，技術已相當成熟，「唔會因為大廈越老就越危險。」陳說玻璃幕牆越趨進步，在構建、工藝及外觀上技術提升，「以前嗰啲只係外觀上冇咁豐富。」例如舊式玻璃幕牆被批反光度高，令到街道氣温更高之餘，室內氣温亦難以散熱。「但𠵱家的玻璃幕牆用嘅都係中空玻璃或雙層玻璃，反光度低，亦有隔熱隔音的作用。」