【海上奇人】一隻快艇一把槍　白沙灣蟹哥：打一季魚賺廿幾萬

牛池灣一間茶樓，有一個傳奇的茶客，擅長打魚捉蟹。他用魚槍打來的大魚，最大條有100斤重，打來的魚都在茶樓賣給茶客。他又會徒手捉青蟹，捉來幾十斤蟹，索性塞入潛水衣內，大家都叫他一聲：「喂，蟹哥。」人如其蟹，肩上騎着兩隻鸚鵡如保鑣，大搖大擺走進茶樓。
打魚，不同網魚，在船上把網拋下去，拉上來就有魚穫。打魚要找有大魚的地點，是每個打魚佬不斷游，不斷游，冒着生命危險尋找。因此那天記者和蟹哥出海打魚，他只是說：「我們要去很遠的地方，你會後悔嗎？」硬着頭皮，我們乘快艇一個多小時，跟無數貨船擦身而過，海水從淺綠，變成深綠；從群山小島駛到最後一個小島，遠望就只有一片天。
攝影：李澤彤、陳芷慧

上集：【海上奇人‧上】徒手捉70斤青蟹不怕痛 「痛，才覺存在」

欲知蟹哥打過什麼大魚，請點擊下圖：

打魚，是以命相搏

所謂打魚，是用魚槍，其實像一根很長的茅，一拉，一射，刺進魚身。蟹哥在船上穿好潛水裝備，揹着十斤重的氧氣樽，一轉身，跳，就消失海裏。45分鐘過後，他吹響哨子「咇」的一聲，船家：「嘩，嘩，嘩，有正嘢喎！」只見他游近船艇，一鼓作氣，把腰間一束五、六條共幾十斤的大魚拋上船，船家接過去，他再喊一聲，用盡力氣，爬上船。他每次從水裏上來，都軟躺在船上，皺着眉，大嘆一聲，和魚紅紅的腮一樣，一吸一呼，拼命呼吸。

氣順，回神，蟹哥才興奮地說起剛才海裏的事。「嘩，今日啲水好清，一落到去就有幾條大嘢，開心到我啊！」，「今日打咗條國寶。」。國寶，就是紅斑。除此以外，還打來青斑、紅油，然後又拉開潛水衣，淘出一隻小龍蝦給我。他說現在海裏的魚蝦蟹不及從前的精彩，「以前我捉龍蝦，可以捉十幾廿斤，現在呢幾個月都捉唔到兩斤。」蟹哥說。填海多了，船又多，打魚的人更是多而又多，現在海裏少了從前的生氣。「𠵱家落水，好多都係放生魚，啲魚爛身爛世。」

有一位茶客說：「𠵱家休魚期阿蟹邊可能打到魚，佢應該係買返嚟。」又有人說他應該在海底裏放了一個魚籠，然後把養的魚說成打的魚。「嗰日佢過嚟同我打招呼，我即時還拖。我哋牌頭好緊要。」蟹哥說。魚，網和打；養或野生，價錢不盡相同。

更何況，打魚，是以命相搏。遇過大魚，槍還被魚搶去。曾遇過一條100斤大魚，要連射三槍，運用全身僅餘力氣連人帶魚一同上船，魚上船，人又跌回海裏。他又曾被毒魚刺中，「喺個窿摸到條泥鯭，軟淋淋，一手摸落去，嘩，痛到啊！成隻手痺㗎！痛到喊都喊唔出，𠵱家呢，十分鐘後我就冇事。」他說毒魚中最陰毒的就是獅子魚，斑斕的鯺散開成一朵蒲公英，蟹哥被牠鯺刺中，躺在醫院病床上足足五天。

龍躉其實是一條「毒L」

「起初我都打唔到，要不斷摸索，累積返嚟。」他一家三兄弟都「玩水」，少時死慳死抵儲錢買一副潛水鏡，穿白鞋潛水。第一個打魚的其實是蟹哥的細佬，80年代已經潛水。蟹哥則直至2000年才正式考潛水牌去打魚。初學，打不到魚，人人都叫他做「嘥氣」，「啊嘥氣又嘥氣落水打魚。」

如今，各種魚的特性，他如數家珍，「我見到條尾就知佢係咩魚。」較難打的是龍躉，因為龍躉其實是一條「毒L」，從來獨來獨往，素來「一夜情」交配後即閃，而且沒有特定水域，「一個位得一條，唔容易撞到。」；「大青斑，最大條50斤，野性，唔驚人，最鍾意跟住人。你唔去追佢，佢走，佢會拎返轉頭望住你。咁樣代表魚唔驚你。你入侵佢地盤，佢只係望吓你做乜。」

魚都係衰八卦

魚，藏於石窿，因此，尋魚先看水域附近有沒有山島、小山，看看山頂有沒有碎石，「如果碎石碌落去，就可能有石隙。」，「我打過咩魚，幾大幾多，第一條打咩魚我都記得。」他第一條大青斑、第一條100斤的大魚，就在珠海小島附近。「嗰時條青斑喺個窿口望住我，嘩，開心到啊！直情兜口兜面打落去。佢八卦，經過第一次，就知點打。」他說怕人的魚，如箭速逃，人永遠追不上魚，打不到。「今日我打佢唔到，佢遲早都係我。佢哋喺嗰個窿，就喺嗰個窿。」他說魚像一些老茶客，永遠獨霸那一枱。「我話畀你聽，係啲魚嚟揾我，唔係我揾啲魚。」他在水裏閉氣，靜，八卦的魚就探頭出來看過究竟，「只要走入我鎖定的射程，佢走唔甩。」見魚慢游過去，或從後包抄。

夏季勤工，冬季玩樂

他說，打魚興趣比錢為重，「以前有份工，逗份糧，打魚為興趣，打返嚟係派。」直至一次有街坊在其背後說了一句：「唉，其實我唔想要，係阿蟹逼我要。」被蟹嫂聽到，氣言：「你話你係咪賤吖！」從此，他的魚賣，不派。「成世人最管得我勁嘅就係層樓。」蟹哥說。當了半世樓奴，決定辭去正職，賣魚維生。每次打魚回來，早有客人在白沙灣碼頭守‍候。

非一年四季也能下海打魚。「大概清明前後三月份左右及至聖誕節。」因此，他夏天勤工，冬天耍樂。「打一季魚，賺廿多萬，冬天就洗錢，唔係大花筒，都係洗咗幾萬蚊。」，「打一日魚，賣幾日，幾好啊！由細到大都嚮往呢份自由。」

自由，卻有代價。

假如有一天我沒有回來

「打魚，好高危。」蟹哥說白沙灣有一個不好的流言：「死人啊？一定經阿蟹。」每次他下水前，他必先撒下黃黃的冥錢。「呢隻船，就係我過世的朋友。」早四、五年前，一位開船廠的老闆請他跟友人一起到南海潛水打魚。結果，老闆因為在深水區用盡氧氣，一時情急上水，爆肺身亡。「船上響警號，當我上水，已經見佢口吐白沫，全身黑晒，冇體温。」

又有一次，有人請他帶路開船去潛水，有人久未上水，「後來，喺廿幾呎水揾到佢，伏在一處，冇反應，給泥鯭籠的繩纏住，樽仲有氣，但氧氣離咗口。」找他帶隊的朋友又四圍說他「邪」。又有一個朋友是給船的螺旋漿打死。「唔好諗住有人幫你，要自己解決，永遠都係自己一個人。」

採訪出海那天，踏上小艇，我其實有點後悔，我問：「蟹哥，你為什麼不買一隻大啲嘅船？」他說再大的船，在大海上都是一粒芝麻。「我成日同我老婆講，如果有一天，我返唔到嚟，你唔好怨任何人，唔使揾我。」就讓當天逃學到海邊的男孩，隨海風而去。