【20日大挑戰】港男用腳環港一圈 唱歌下廚換食宿：係熱血嘅夢想
Swing，80後，曾往台灣單車環島遊，又試過由四川踩車上西藏，兩個車轆帶他踏遍無數山嶺。去年9月，他背着約20公斤的大背包、一個ukulele小結他、一道「香港是怎樣的地方」的疑問、一面「環我香港」的旗幟，用雙腳展開環港一圈的旅程。
20公斤的行裝
在台灣環島、四川到西藏兩次旅途上，其他遊人總會問起香港是一個怎樣的地方，Swing才發現除了幾個購物熱點、一些自然風光以外，他對自己生長的地方，其實不甚了解。一次飯聚提及「環我香港」的提議，膽粗粗向友人挑機：「有冇興趣，夠唔夠薑先？」於是，二人花了一星期計劃行程，以尖沙咀作起點，經過啟德、觀塘、將軍澳，往西貢至新界，攀過大嶼山幾個山嶺到香港島。9月22日，二人揹起背包出發。
20公斤的背包，裝上兩三套衣服、後備乾糧、氣爐，以防被困荒山野嶺會餓死，「都幾重，比正常露營嘅嘢多，全套武裝，唔依靠任何一個地方都生存到幾日。」上山下海，Swing竟堅持帶上小結他，笑言兩男行山缺話題時，可彈奏一曲篤破「老尷」。走到東涌街市，小結他竟能大派用場，「撩阿姐吹水，我話不如咁我唱首歌你聽，你請我食嘢啊！」結果，Swing彈唱「一雙手」後成功換來一碗碗仔翅。
第1天：尖沙咀＞啟德＞觀塘＞鯉魚門＞將軍澳＞山洋山 / 田下山＞釣魚翁
第2天：釣魚翁＞科技大學＞白沙灣碼頭（船）＞三星灣＞西貢市中心＞北潭涌
第3天：北潭涌>萬宜水庫西霸＞萬宜水庫東霸＞蒗茄＞西灣山＞西灣＞鹹田灣＞東灣
第4天：東灣＞米粉頂＞蚺蛇尖＞蚺蛇坳 / 北脊＞蚺蛇灣 (船)＞高流灣＞灣仔西營地
第5天：灣仔西營地＞海下＞荔枝莊＞深涌＞榕樹澳＞馬鞍山
雙腳滿水泡 照攀蚺蛇尖
Swing倒有不少令人費解的執著，做人處事「意義大過天」。20天的路，選一對鞋比計劃行程更花時間，「出發前喺屋企揀咗好耐。」最後，他穿上在西藏購買的「 解放鞋」，是種軍人穿的鞋、布質休閒sneaker款，「我諗佢陪過我去西藏，不如陪埋我去香港啦！」解放鞋其實不舒適，一星期後，雙腳已滿是水泡，「喺鹹田灣嗰晚生咗大粒水泡，係正腳板底，行路都痛。」翌日，他就攀上被喻為香港第一險峰的蚺蛇尖。結果，水泡連同山峰一同被征服，「水泡都踩扁。」這趟旅程，他們同時征服香港「三尖」（蚺蛇尖、釣魚翁、青山）。
鹹田灣借宿
曾有人對Swing說「環我香港」是「攞苦嚟辛」。當他感到疲累時，亦常自嘲：「開頭成日問自己咁辛苦做咩啫，明明喺屋企可以歎住冷氣，玩陣電腦轉個頭就瞓。」
每晚還要四處尋找適合露營的地點。他們的旅程，四份三的晚上都是露營度過。雖然沒有高床軟枕，但這種住宿方式拉近了Swing與村民的距離。某夜，Swing和同伴在鹹田灣尋找露營地方時，村內原居民竟借出屋外空地，晚上大家更促膝長談。Swing說，不少村民外流回來，屋主也於六七十年代乘遠洋貨輪去歐洲，在英國做廚師糊口半生、成家立室，後來回流香港，幫兄弟經營士多，子女則繼續留在英國生活。他說：「𠵱班人冇喺香港出現幾廿年，但綁住香港情意結喺個心，佢哋老咗會返嚟香港呢個家，死後會想葬喺度，我覺得絕對比我哋呢一代有根嘅概念。」
第6天：單車：馬鞍山＞科學園＞大埔＞大美督
第7天：大美督＞船灣淡水湖＞三椏涌營地
第8天：三椏涌營地＞荔枝窩＞谷埔＞沙頭角 (船)＞吉澳
第9天：吉澳
第10天：吉澳 (船)＞沙頭角＞上水＞古洞＞米埔
第11天：米埔＞南生圍＞天水圍＞下白泥
下白泥：下廚換宿 村民當導遊
同樣因為找尋地方露營，Swing結識了下白泥的阿Ken，並在他燒烤場旁的小木屋渡過一晚。翌日，阿Ken大清早從家中摘來瓜菜、準備了一些食材，要求Swing他們下廚。Swing回想︰「互動係開心嘅。」吃過早餐後，阿Ken還載着他們在下白泥玩了半天，盡訴村中問題：海灘垃圾、逢假日經常大塞車、暴雨期間河道氾濫。靠村民帶路，他們去到當地人的私家景點－－山上溪澗。「我諗普通人唔會去嗰個地方，我相信唔識路好難去，要瓹窿瓹罅。」短短半天旅程令Swing有所領悟，「正確旅遊態度係應該真正欣賞、投入多啲、了解多啲佢地嘅故事，唔係單單影完相就走。」
第12天：下白泥＞龍鼓灘＞青山山頂＞蝴蝶灣營地
第13天：蝴蝶灣營地＞屯門 (船)＞東涌＞逸東＞大澳＞煎魚灣營地
第14天：煎魚灣營地＞大浪灣村＞石壁＞塘福
第15天：塘福＞東狗牙＞鳳凰山＞伯公坳＞大東山
第16天：大東山＞二東山＞貝澳
最美最險的鳳凰山
離開下白泥，Swing和同伴開始第12日的行程，爬過青山山頂，在蝴蝶灣營地住了一晚。第13日他們去到大澳水鄉，住進水上人家中欣賞大澳。不經不覺，旅程剩下5天，他們把握時間爬上香港第二高的鳳凰山。山路比Swing想像中還要陡峭，看着眼前的太陽慢慢消失在海平面上，天色逐漸昏暗，上山的難度大增。他們戴上頭燈，以雙手抓緊石頭一步步向上爬。
走到鳳凰山山腰、狗牙嶺的路上，Swing看見眼前有幾點光，擦擦眼睛才看清是幾隻螢火蟲在草叢中飛。他立即叫停同伴，二人安靜地坐着欣賞。上山的路好辛苦，突然出現的螢火蟲像是為他們打氣，「見到好驚喜，還有少少感動，螢火蟲要喺好多條件下先會存在，喺香港幾乎冇。」告別螢火蟲，他們繼續向上行，但四周不再寧靜，傳來雷聲。到山頂後，烏雲蓋頂，天氣轉差，雨勢愈來愈大，電閃雷鳴。Swing憶述：「喺戶外，無野嘢遮擋，又打雷，濕住身喺樹林好危險，我哋盡快搵個安全地方。」幸好，他們走到山腳時發現了一個涼亭。
朋友組支援小隊送上電源
一路上，同伴與Swing同甘共苦。但在旅程的第6天發生了小插曲，同伴收到電話要到市區見工。Swing便在大尾篤國際青年旅舍悠閒地渡過了兩個晚上，等待同伴回來。8天後，同伴又接到第二個見工電話，「佢每次出去，我都同佢講我會喺原地等佢。佢都幾辛苦，冇時間準備見工，見完工又要返嚟繼續行。」Swing說。同伴無論有多辛苦，也未曾離棄，每次見工後都會準時回到原地會合Swing。
除了同伴的不離不棄，Swing背後還有其他朋友默默支持。旅途中，有些朋友會參與白天的行桯，亦有朋友組成「支援小隊」，分別在港九新界支援，Swing說：「我哋有咩突發事件、需要，都會同佢哋講，例如電力，佢哋都會盡量幫我哋處理，冇支援小隊會辛苦好多。」
第17天：貝澳
第18天：貝澳＞十塱＞梅窩＞中環添馬公園
第19天：中環添馬公園＞上環＞貝沙灣＞數碼港＞香港仔＞赤柱＞龜背灣沙灘
第20天：龜背灣沙灘＞大潭＞土地灣村＞龍脊＞柴灣＞灣仔＞尖沙咀
環港，是一個熱血的夢
回想旅程的辛酸，Swing說：「我覺得自己都幾犯賤，但我好鍾意透過比較辛苦嘅旅程去了解自己，喺勞累過程中尋找自己最真實嘅感覺 。」他希望香港人反思：點解咁鍾意去旅行，一年去幾次日本、台灣，都唔會去香港郊區，花一日時間發掘香港有特色的社區。環我香港對他不只是一個尋找自我的方式，還是一個夢，「發夢都唔會做嘅一樣嘢，對現實生活嚟講係好唔實際。但對我嚟講，係比較熱血嘅夢想。我完成呢個夢想之後，希望有更多人發𠵱個夢。」Swing說。