【專訪】製作人周沂轉戰幕前　苦練到喉嚨出血：唔想唱得太核突！

「世上沒有懷才不遇，只看你有否百分百爭取過。」劉德華說。
呢句說話，原來都幾影響人。
「總有一日，你會知道邊個係周沂」樂壇新人說。
攝影：黃國立

踏入下半年，大公司的新人仍未見蹤影，反而細公司﹑獨立形式的新人相繼出現，其中一個值得關注的，就是女製作人Stella Chow周沂。事關她當了7年幕後，曾與黎明、雷頌德﹑李治廷、JohnnyYim、JW黃灝兒、恭碩良及馮允謙等合作，齋睇個履歷就覺得佢有機會跑出，想唔紅都難，不過她認為：「我拋個身出來唱歌，就預左畀人掟雞蛋。」她續道：「我想做一個CV，畀行內人睇，其實我唔係好Care幕前這一部分，我唔驚紅定唔紅。」

我們經常聽到「懷才不遇」四個大字，周沂坦言：「以前有少少(覺得懷才不遇)，以前作詞真係好想死，已經好努力作，啲人都係要彈，其實唔係懷才不遇，被人折磨已經係遇上，現在唔相信懷才不遇，成個互聯網，就算你識搞笑都可以爆紅，所有能Impress到人的才華，都可以紅，視乎自己是否玻璃心而放棄，你真係有才華一定有人賞識，如果我咁努力都冇人聽，證明只係冇才。」她續道：「我對自己有信心，我做左咁多年，啲野唔會差得去邊，音樂好Personal，一定有人唔鍾意，邊有得控制？ 我睇得好通透， 呢個年紀我唔會畀自己玻璃心」。

周沂7年前以填詞起家，7年後轉戰幕前，表明不會貪戀什麼新人獎，企出來做新人，都是為了推廣自己的音樂作品。科技令人懶左，但幫左好多先天條件唔叻既人」，她坦言編曲不是強項的關係，自己所作的歌曲Demo只有簡單旋律，推銷歌曲時，往往不被音樂人選中。「佢地聽唔到Potential ，詞都未聽，所以我好唔憤氣，好想自己出。」推出的首支歌曲《Black Hole》就是自己「賣唔出」的作品，她笑言：「好多人話好聽，但冇人要，好難Sell，我唔唱冇人唱」。

《Black Hole》原本是一首情歌，Stella話「情懷返唔到轉頭」。這首作品初頭是她對感情的一些看法，但日子久了，對愛情的觀念有不一樣睇法，最終變成勵志歌。第一首歌是英文歌，即將推出的作品，就是廣東歌和國語歌，她對如何「推銷」自己早已訂下計劃：「儲咗5-6年歌，今次揀咗最好聽10首歌出碟，我覺得對得住任何聽我歌的人，拿出一些對得住樂壇的製成品出來，有計劃過今年派3首歌，3首今年PLUG，下年3首。」

幕後音樂人轉戰歌手，究竟成績會係點？咪話唔期待。

唱歌好唔好真係睇狀態，不過講到製作，我一定會有質量保證！