衛蘭出年一月再開演唱會　粉絲網上點歌紅館唱

衛蘭雖然曾經被黎明取笑佢「肥過部電單車」，不過上天係公平嘅，所以賜咗一把靚聲畀佢。自從轉咗新公司，衛蘭最近頻頻出新歌，簡直係歌迷福音，而愛錫衛蘭嘅一眾樂迷紛紛喺「King Jer娛樂台」票選衛蘭成為「最靚聲歌手」嘅冠軍。得到三千幾票嘅衛蘭不但止拍片喺網上謝票，仲同歌迷宣布咗一個好消息，就係佢再開紅館騷啦！

自從2014年開完《衛蘭 Walking to the future 2014紅館演唱會》之後，Janice已經事隔三年無再開紅館騷，今次Janice同大家確認：「出年一月，我會喺紅館開我嘅個人演唱會。」出道將近十四年，數數手指，原來呢個已經係衛蘭第四個紅館舉行嘅個人演唱會，之前仲試過喺紅館開三面台！唔知今次有無機會開足四面呢？近期紅館檔期咁爆都畀Janice攞到一月開騷，粉絲當然開心。不過更加令人興奮嘅係，Janice呼籲粉絲可以隨便喺網上點歌，到時會跟據民意喺紅館唱返比大家聽，好快已經有唔少網民指定要點唱《如水》、《心亂如麻》、《大哥》呢啲大熱作品。似乎近年歌手都興玩網上點歌，有個咁民主嘅制度實在係令人鼓舞呀！

其實聽靚歌就預咗架啦，不過深信更多人期待衛蘭演唱會嘅Poster快啲見街就真。話晒衛蘭仲喺A Music旗下嘅時候都發生過唔少「Poster靈異事件」，包括2009年推出精選專輯《Wish》嘅時候，以衛蘭展示「超人體工學」瑜伽姿勢作為封面。另外2014年嘅時候，《衛蘭Walking To The Future Live》嘅演唱會Poster當中，衛蘭亦離奇地由「電單車」身型瘦到變返出道時期咁Fit。唔知道轉投新公司後第一個紅館騷嘅Poster又會唔會有新驚喜帶畀大家呢？