HIT歌先要有個爆歌名？ 填詞人陳詠謙：歌名可以令首歌起死回生
正所謂「人唔怕生壞命，最怕改壞名」，可能連歌曲名字都一樣。最近就發現，原來有唔少hit過嘅歌曲，都係以「給自己」而作為歌名嘅開頭，而且反應叫好叫座。例如：王菲嘅《給自己的情書》，梁詠琪嘅《給自己的情歌》及李宗盛嘅《給自己的歌》等等，首首都唱到膾炙人口。你可能會諗，佢地三個都係天王天后級，加上唱歌好聽，所以唱乜都紅。但係鍾舒漫嘅《給自己的信》，Keeva麥家瑜嘅《給自己的命書》，光良嘅《給自己》等等，其實都有不俗嘅成績。
究竟哩啲歌會hit係因為用上自己第一身所以特別有Feel，特別有共鳴？還是「給自己」哩類歌名嘅歌有一種奇妙嘅吸引力？
被譽為黃偉文接班人嘅填詞人陳詠謙接受訪問嘅時候就有自己嘅一套睇法：「我又唔係好認同「給自己」就一定HIT，不過我覺得以前『給自己』嘅歌曲唔多唔少都係因為王菲嘅《給自己的情書》而開發出嚟，因為哩首歌真係太hit。我諗『給自己』哩類歌名會令歌迷去聽嘅原因，係同香港文化有關。香港係一個較壓逼嘅城市，年青人無乜機會同自己傾計，好多年青人都唔識得表達自己，所以哩類型嘅歌就會變成一種同自己展開對話嘅工具。」
陳詠謙：「古語有云『人唔怕生壞命，最怕改壞名』，哩句說話我好認同。一間餐廳都要有個好嘅招牌吸客，一個好嘅時裝品牌都要有一個型嘅logo，當然歌名都唔例外。一首歌，如果歌詞平庸，但一個hit到人嘅歌名，可以令一首歌起死回生，改錯歌名亦可以令哩一首再感動人嘅歌石沉大海。就好似JW嘅《矛盾一生》，其實歌名本來叫《矛盾》，但諗咗好耐，《矛盾》嘅個名好似唔夠響，唔夠力，就咁叫《矛盾》應該唔會hit，點樣可以戲劇啲，點樣可以再令人有歌曲嘅意景？我再諗一諗，要你矛盾一世先夠傷，要你矛盾一世先夠強烈，所以最後到派台當日嘅朝早，我就將《矛盾》變成《矛盾一生》。」
「講到今年個trend我仲未睇到，今年最hit嘅兩首歌《長相廝守》，《原來只因深愛著》，歌名都唔算好特別，但係都hit爆，所以話呢當你見到個靚嘅女仔嘅時候，你理得佢個名叫做Mary又好Margret都好，樣夠靚，你最後咪一樣會溝！所以希望香港有多啲靚女啦！」陳詠謙說。
「其實歌名就係標題黨」
至於問到香港灸手可熱填詞人梁柏堅就覺得「給自己」系列爆紅有另一個見解。梁柏堅表示：「真係無諗過點解『給自己』系列嘅歌會紅，可能係因為『給自己』都係女仔歌，比較容易有女仔market，同埋哩類歌歌名好catchy（搶耳）。其實歌名就係標題黨，因為而家網民聽歌唔會聽哂一首，只會聽一段，所以我覺得哩個年代要改歌名，要夠古怪，夠catchy，夠slang（俚語），因為依家歌名就等於hastag。」