樂印姊妹由沙發唱到舞台　家姐最愛古典音樂：五月天啲歌好嘈

「終於開騷喇！自出娘胎開始我哋就係會有一日會企喺個台到！」SiS樂印姊妹一講到開騷，就興奮的講了上面的這番話，本月即將在九展舉行的「SiS cappella Dream Concert」是樂印首個個人音樂會，由家庭卡啦OK唱到今年終於可以踏上台板，將A cappella和流行曲融合，為大家帶來她們修練了20幾年的音樂。
攝影：黃國立
髮型及化妝：Rita Leung
服裝：Tout a coup@it
場地：Artbeat Plus

童年時屋企就是最好的遊樂場，不過獨生子女會比較慘，雖然可以玩煮飯仔，但要一個人做晒爸爸媽媽囝囝囡囡；可以扮超人，但自己做超人就要打公仔怪獸，SiS樂印姊妹比較幸運，因為有一個兄弟姊妹，而且對方和自己是有共同嗜好真的很難得。

在兩人的眼中，屋企的客廳就是屬於自己的舞台，依照兩人所講，兩人3歲就已經出道，首個出道舞台是家中的沙發，出道一歌是「《雙思風雨中》駱氏姊妹Cover.」。「我哋細個企喺沙發上面，然後會好型咁跳落嚟，以前仲有張雲石枱仔，我哋會跳上去唱歌。」

兩姊妹雀躍地回想以前，笑言當年總是在父母上班的時間，偷偷開卡拉OK機唱歌，「佢哋會有啲大碟（LD），唔係黑膠嚟，我哋個時唔識分，只知有部機有得唱卡啦OK，有枝咪可以插入去，偷睇完大人點做，我哋就私底下跟住做，成日自己插枝咪唱。」

卡啦OK，樂印姊妹細細個就開始唱喇，而且兩人更因此有了第一個偶像，他就是張學友，「唱K的雜錦碟一定要有佢嘅歌，成日聽張學友、徐小鳳、蔡琴，我哋會聽上一代嘅歌。」兩人更笑說好想請學友做今次音樂會的嘉賓，不過其實也太妙想天開了吧。

兩人年級不同，所以功課上沒有甚麼交流，小時候的話題除了講學校老師壞話就是音樂，問到兩人是否從小就有相同的音樂取向？妹妹駱胤鳴（烙印）就投訴話家姐駱胤樺（樂樺）曾經彈五月天的歌好嘈：「有一排我好鐘意五月天，佢就係咁話五月天啲歌好嘈，我就解釋係因為個喇叭問題，個音響唔好好令佢覺得好嘈啫。」

被妹妹投訴，樂樺就解話話因為自己比較喜歡古典音樂，所以會覺得Rock n roll好嘈。樂樺又自認是乖乖女一名：「細個買碟好貴，百幾蚊一隻，我會好乖去圖書館借個啲嚟聽，好乖㗎，聽完兩個禮拜就還，同佢（烙印）好唔同，佢就網絡去聽。」烙印聽言就笑說其實自己亦會在旁聽家姐借的碟，後來年紀漸長，大家亦開始懂得互相了解對方的音樂世界，直至現在一齊出道做歌手。

問到今次開騷可會再唱兒時卡啦OK的飲歌？兩人就話舊曲經典個個都識，反而近年香港樂壇慢慢在萎縮：「大家都只係懷舊，向前輩致敬，但冇新嘅音樂，我諗唱新歌會比較近乎我哋嘅理念，可以向同輩致敬。」