【專訪】樂印姊妹苦練acappella3年　開騷人生大事唔同媽咪講

SiS樂印姊妹是香港樂壇少有的親姊妹組合，兩人的小清新風格一直深入民心，大部歌都正能量爆燈，而不是市面上一式一樣的情歌。直至今年，兩人終於有機會於九展舉行首個音樂會「SiS cappella Dream Concert」。
攝影：黃國立
髮型及化妝：Rita Leung
服裝：Tout a coup@it
場地：Artbeat Plus

聽個名就知道今次是一個以acappella為主題的騷，音樂性肯定很高，而同時原來家姐駱胤樺（樂樺）已接觸acappella多年，讀大學時更與其他同學一齊玩acappella玩了三年，專業就未講得上，不過公司正正是看中她在這方面的才華，妹妹駱胤鳴（烙印）表示：「家姐經營咗acappella好耐，咁啱今年我哋有個新嘅計劃，當然係公司同事覺得家姐係時候喇！」

談到音樂會的內容，兩姊妹興奮講到，大概三分一會是acappella，三分一與其他人合作，再加三分一是「樂印時段」。過去人們好多時候會覺得acappella是藝術層面的事，今次可以開音樂會，再做一首acappella的原創歌是一件很令人鼓舞的事：「通常啲人會喺藝術層面上睇acappella，好似聲樂咁，好少攞出嚟變流行曲，但我哋就係將啲好似畀人擺咗上神枱嘅嘢攞返出嚟，因為音樂不應該有局限。」

弊傢伙，開騷冇同阿媽講！

一般開騷除了主角本人，身邊的親友都會好戥他們高興，樂印兩姊妹出自同一家人，父母見到女兒爭氣大概也很高興吧？講到此時，兩姊妹你眼望我眼，發現今次大鑊喇，開騷咁大件事居然沒有和父母事先講定，正當妹妹手足無措之時，家姐姐淡定的說了一句：「其實係好擔心佢會嚟，唔想佢嚟。」

父母都會擔心我哋，大家返工時間唔同，有時幾日都見唔到我哋，就會打電話問我哋：「你哋做緊乜啊？」

樂樺直言因為父母在場自己的驚和緊張，而烙印就覺得好希望透過今次音樂會，讓父母了解自己的工作：「佢成日都會覺得點解你咁夜返，點解你唔飲湯，佢成日都會好多問題，但佢用好多包容同耐性畀我哋。」問到媽咪會否經常追魂call，關心她們的工作？兩人直言好感謝媽咪一直無限包容，又會時常煲湯給她們補身：「佢都會擔心我哋，大家返工時間唔同，有時幾日都見唔到我哋，就會打電話問我哋：『你哋做緊乜呀？』。」

正所謂「有媽的孩子像個寶」，兩人都從父母身上得到很多的愛，而最後兩姊妹傾掂數，妹妹會告訴媽咪開騷的好消息，而家姐要求妹妹只做一件事：「你話畀佢聽，然後唔好話畀我聽你話咗佢聽，咁我咪唔知囉。」