Tom@Mr.開班教鼓鬧客　fb爆seed：想試我底線的人麻煩行開

樂隊Mr.自從和唱片公司完約後，一直沒有新發展，成員就各自努力搵錢，而有家室的Tom（杜志烜）就繼續和朋友一齊做生意，開班教打鼓。做得和音樂有關的生意，當然是吸引志同道合的人一齊玩音樂，不過當中受到不禮貌待遇的話，又的確幾令人勞氣。

Tom於昨晚在Facebook貼上一條「出氣post」，內容大致上是說有客人到其音樂學校報名，期間諸多要求，一開始叫他示範打鼓，客人想試老師的水準非常合理，所以Tom都乖乖照做，但後來客人又話自己已不是「鼓壇新手」，要求Tom「show 啲嘢睇吓先啦！」以說服她報名，Tom在文中講到一直都「盡我能力去滿足她，再打，再示範，再講解。」但客人的注意力卻沒有放在音樂上，反而無啦啦問Tom:「你啲頭髮真定假嫁？」，之後又話要問朋友意見再決定報名與否，最奇突的是，客人臨走時刻意講到：「我知你係吖Tom啊嘛！我知啦！」到底用意何在呢？

寫完一大堆的對話內容後，Tom終忍不住爆seed說：「其實係我個樣比較薯嘜，好似比較易蝦啲，定係其實本身有啲人本身嘅性格就係咁，好鍾意試別人嘅底線。」Tom又坦言如果即時揶揄對方，可能會被不夠友善，又怕影響公司形象，不過Tom似乎已經看透了，揚言自己和公司不會再怕得罪這種人，最後更重申：「我份人並不是那麼討好的，想試我底線的人，麻煩行x開，我唔想浪費寶貴嘅生命係（喺）啲x樣度。」而文章的後段，Tom完全沒有留手地打粗口，可見Tom的怒氣真的相當猛烈。