Supper Moment演唱會「解禁」唱舊歌　真Fans聽到喊出嚟！

Supper Moment能夠登上紅館的確是「大奇蹟日」，是本地獨立樂隊的奇蹟。演唱會尾聲唱《Supper Moment》前，Sunny激動話：「今晚係最後一場，每唱一首歌都喺度flashback以前嘅畫面⋯⋯」樂迷又何嘗唔係呢？

由「Band界紅館」蒲吧走到真紅館，樂迷都記得當時Sunny還是紫色冬菇頭，阿雞每次彈solo啡髮總遮着半邊面，紅頭CK拿着5線Bass及金色all back頭的阿達。以往在蒲吧台下企最前緊貼台邊，近得伸手可及的距離；在紅館即使坐第一行與舞台至少相隔兩、三米。Sunny由攞木結他都變成攞電結他多，阿雞變成長髮紮辮，CK和阿達多了個紋身，無論外型如何轉變，那份感動依舊不變。騷後接訪問時，他們也表示心情如以往一樣激動：「一樣咁激動！係場館唔同咋嘛，本質係冇變！正如第一晚所講，就係想將更多愛帶俾呢個場館，呢個世界，就係咁簡單！」

唱《靈感床》時videowall播出卡通版《等等⋯》、《旅程》及《再次心跳》的專輯封面，也算是「彩蛋」之一，呢幾隻碟你有冇keep起到呢？頭兩張實體碟都賣到斷晒市，有一些「禁歌」如：《對岸對望》、《小行星》、《Love Song》，樂迷都經常笑說何時會再唱Live。其實在《等等…》之前，還有一張隨雜誌附送的細碟，而那本雜誌還有《最後晚餐》的結他譜，相信不少人學懂最準確的彈法都是靠這本「教科書」。

還有video wall左上角的搖滾手勢動畫，令人想起曾有些mean comment「斬晒啲手指公佢」，事關很多人大合照時以為自己高舉搖滾手勢，但實質那是Love & Peace。

唱《Supper Moment》時videowall播出以往演出的「bootleg」，有中堅樂迷可以講出每場騷的細節。如：2011年在蒲吧舉行的《Diamond Live》，阿雞弄傷手堅持演出，左手手腕還纏著繃帶。所以話，不止台上Supper Moment成員不斷flashback，台下樂迷亦如是，難怪不少人偷偷拿紙巾拭淚。Encore終於唱《P.S. I Love You》，不少樂迷也得償所願，阿雞還「解封」以往常用的棗紅色PRS Modern Eagle II結他，也是昨晚的一大彩蛋。

這把結他至少「服役」了6年，錄音、出騷、走埠都有佢份，在《小伙子》、《飛》、《機械人》等等MV都見它的縱影，阿雞彈到fret都蝕埋。近年出騷阿雞都轉用了不同顏色的PRS結他，到昨晚那把棗紅色PRS「解封」，還要奏出《P.S. I Love You》的solo，簡直像回到從前一樣，難怪騷後阿雞也說「頭先彈段solo都爭啲想喊」。

當年在蒲吧唱《P.S.I Love You》仿似還是不太久以前的事，昨晚在紅館台上再次聽到，感受特別深刻

對樂迷來說有很多舊作還未聽到，有點意猶未盡，但他們笑言已經將「禁歌」搬上台面：「我哋都玩咗好多舊歌嘅！好似《今夜酒氣吹過》啦，『禁歌』嚟㗎！（禁歌唔係《Love Song》咩？）我哋唔止一首嘅，哈哈！其實今次rundown唔係求其擺啲歌落去，而係憑我哋嘅經驗去營造想表達嘅效果。今次每晚encore玩嘅歌都唔同，到2月喺澳門開騷嗰陣又可以試下玩其他歌。」