BOYZ處男開騷回憶返晒嚟　艾粒「預告」2019年兩隊合體闖紅館

BOYZ成軍15年今晚於九展Star Hall舉行《The Unboxing Live》演唱會，兌現承諾與fans一起圓夢。張致恆（Steven）與關智斌（Kenny）早前出post宣佈dresscode是校服，雖然當時有人話「去邊嘔出嚟」、「肥到着唔落」，但今晚也有不少fans「俾自己瘋狂一晚」穿上校服。

Steven與Kenny一出場以勁歌熱舞炒㷫全場，《La La 世界》緊接《Ready To Go》這個combo令全場fans尖叫，人人邊唱邊跳，確實回到學生唱K的時光。Kenny更脫去外套身穿Deep V背心騷肌，又擺pose又打空翻，殺死全場「學生妹」。

話晒BOYZ是集體回憶，Steven與Kenny在台上擺當年的經典pose，笑說當年在Mani房練了五百多次，又表示自己賺到：「其他人做演唱會嘉賓最多賺到化妝set頭，我哋賺到個演唱會！」Steven插嘴：「分分鐘賺到復出機會㖭呀！」見兩人滿頭大汗，阿嬌驚喜現身送紙巾，今次演唱會真係多「彩蛋」。

另一彩蛋是艾粒出場，宣佈與BOYZ明年合體到紅館開騷，阿占一出場冇嚟正經，讚Kenny「好大波」，又問他穿甚麼內褲，令對方哭笑不得。唱完《個頭痕唔痕呀》及《我我我我有胸部》，阿占高呼：「大家想唔想睇I Love Boyz同BOYZ喺紅館開騷呀？出年見！」睇嚟fans要儲定錢，預備明年再癲番晚。