林奕匡求學時期內向遭排擠　用音樂令同學欣賞：嗰陣時真係好熱血

林奕匡（Phil）2014年憑著《高山低谷》而唱到街知巷聞，其後《安徒生的錯》、《難得一遇》亦吸引了一班粉絲支持。開學臨近之際，阿Phil更推出他親自作曲的新歌《一世同學》。昨日阿Phil出席港台「太陽計劃2018」畢業禮時，就回憶起自己讀書時的經歷，自己因音樂而變得更加好。

林奕匡（Phil）說：「諗起以前讀書嘅時候比較靜，好少同朋友去玩，又好少出聲。開始學音樂之後，同學對我嘅眼光開始唔同咗，可能係有代表學校去表演，又攞獎，所以就多咗好多欣賞嘅目光，而呢個係我開始有自信嘅時候。」阿Phil提起，自己玩音樂前是一名宅男，更因自己是全校唯一的華人，總是受到歧視。「嗰時成日俾人『蝦』嘅時候，就梗係唔會出眾啦，但係就因為音樂令我成個人嘅氣場都開心咗好多。」
 

林奕匡（Phil）續說：「中學15歲嗰時，啱啱有呢個大轉變。嗰陣時真係好熱血㗎，朝早8點半上堂，7點3就已經喺band房，上堂之前就已經有唱歌或者係Jazz band、concert band，Lunch time又喺band房，跟住放學3點半4點過後又喺band房，跟住就返屋企人餐館幫手。餐廳忙完就返屋企練習練習練習，10點半過後第二朝6點半起身。你可以話我係好似返工嘅形式咁，同埋我嗰時喺個「埠仔」冇乜嘢分心，戲院都冇，所以變相多啲時間做音樂。」所以，林奕匡在音樂路上，其實下了不少苦功。