【張敬軒演唱會】容祖兒贈慶稱「好姊妹」 軒仔反窒：咪諗咩就講
《Hinsideout 2018 張敬軒♭♭演唱會》昨晚於紅館舉行頭場，軒仔再開紅館騷當然去盡佢，一次過滿足樂迷幾個願望。打頭陣讓大家見識過「火爆小甜甜—降兩度」，熱褲長腿兼夾勁歌熱舞唱《Nobody》夠晒「爆炸」；然後正正經經做番軒仔，唱出樂迷票選神曲《不吐不快》；尾段更遨請到天后容祖兒唱出《笑忘書》。軒仔咁錫樂迷，難怪搞到全城「恨加場」啦。
攝影：陳順禎、黃浩晉
軒仔今次演唱會由舞台、服裝，到歌曲編排，依循金、木、水、火、土五大元素作安排。首個環是「火」，以連串節奏明快，充滿爆炸力的歌曲貫穿，如《酷愛》、《最卑微的願望》、《壯舉》等等。軒仔亦以身一身火紅的戰鬥服示人，飆高音、拉長音施展渾身解數，讓樂迷感受到當中的力量。
到「水」的環節，軒仔換上一身雪白的古服，配以中國傳統樂器二胡、馬頭琴及尺八展開序，不禁令人聯想到帶點《白蛇傳》的感覺。歌曲選擇了較感柔情的《下次愛你》、《井》及《天堂有路》，帶觀眾進入一個充滿詩意的意景之中。
接着軒仔換上一襲棕色枯葉造型，唱出《黃色大門》、《囍帖街》以及《預言書》，並向一位不敵癌魔的年輕人Toby致意。軒仔憶起Toby感觸落淚：「我見到佢就好似見到以前嘅自己，最初會熄晒冷喺房入面錄音嘅嗰個張敬軒。當時佢每次嚟錄歌前都要打嗎啡，但願我有呢個勇氣，有呢份毅力去完成夢想。」他續說：「我應承過佢會帶上紅館……Toby，我哋今晚上紅館喇！」台上屏幕播出Toby生前在錄音室的片段，以及Toby的錄音，與軒仔隔空對唱《預言書》，場面令人動容。
傷感過後，到天后容祖兒登場唱出《笑忘書》，本應觀眾仍沉浸在那感動的氣氛之中，但Joey與軒仔妙語連殊，實在令人忍俊不禁。軒仔稱呼Joey為「好閏蜜」，Joey神回一句「好姊妹！」軒仔沒好氣說：「依家好兄弟唔得嘅？我話俾你聽，唔好諗到咩講咩呀！」
Joey又話：「其實我今日係畀面你㗎咋！我見到嗰個『降兩度』我就憎㗎喇，簡直係造成樂壇浩劫呀！叫佢以後唔好出現喺我面前！」Joey就快生日，軒仔送上水果做賀禮，豈料兩人friend底咩都玩一餐，又玩荔枝，又話要請對方食蕉，場面非常惹笑，Joey更說：「叫番『降兩度』出嚟，我要同佢Battle，深水埗Beyonce大戰旺角麥當娜！」軒仔承勢話：「就開一個降兩度X容祖兒演唱會！」樂迷聽到當然願望成真，歡呼聲不絕。
軒仔非常照顧樂迷感受，演唱會的rundown包含由遠至近多首經典作品，在encore環節更首次在香港唱出網民票選神曲—《不吐不快》，一償樂迷所願，不過軒仔卻說：「好怕Live唱呢首歌，係因為要一口氣嘔31隻字……」雖然高難度，但軒仔依然高水準完成，樂迷咁冧係有原因嘅。雖然軒仔及樂迷經常說笑「唔想再聽到《櫻花樹下》」，但始終是代表作之一，又怎能缺席呢。舞台噴出漫天粉紅色花瓣型彩紙，場面浪漫；不過軒仔唱「改詞版」太入腦，險些唱了「太過捐……」，好彩收得切掣唱番「太過堅貞」，為整個有笑有淚的演唱會劃上完美句號。