黃偉文解構張敬軒新歌1985密碼　再開作品展可能要等到2022年

Wyman黃偉文昨日出席時裝品牌活動，席間接受《香港01》訪問，解構為軒仔張敬軒譜詞新作品的密碼。事源近日Wyman在Facebook上披露了軒仔下一首新作品的歌名，在圖片中清晰看見《天才兒童 1985》這歌名以及歌曲班底。歌名一出，引來不少網民好奇，到底《天才兒童 1985》的1985是指什麼？是一個年份？一個密碼？Wyman在社交平台上一直未有清楚解釋，而網民亦開始「齊來競猜」遊戲，有人猜想1985年是一個偉大人物出生的年份，也有人表示軒仔是1981年出生，應該與他無關。

昨日訪問中再次提到這個歌名，Wyman終於解話：「其實1985只係一個約莫嘅時間，其實我係講緊嗰一代嘅人，不論81、82定係87都得嘅，主要都係嗰個年代出生嘅人，而家大概三十幾歲風華正茂。所以其實我係講緊嗰個年齡層，而唔係特定某一年，因為我唔可以寫做《天才兒童 八十年代》或者《天才兒童 1981至1989》，於是就寫成呢個藝術上嘅約數。」

而《天才兒童 1985》亦內含另一個玄機，因為他在社交平台上表示這首作品的序號是1399，亦即意味著Wyman再下一首作品，將會是第1400首，到底在Wyman心目中，他會為這別具紀念性的第1400首預留了什麼位置？想交由誰人唱？主題又是什麼？訪問中他透露：「寫咗詞咁多年，我覺得一啲特別嘅數字，其實係唔特別。如果嗰個特別嘅數字，我專登搞到佢好特別，我就可能會留返畀一個人我覺得好特別嘅人唱。但我覺得人生係應該隨緣，所以每次寫到呢啲特別數字，我就望下啱啱排到邊個，如果睇返我歷年呢啲齊頭數嘅歌，其實大部份主唱都係我冇預計到。例如我第500首作品，其實係一首屬於小雪嘅歌，但小雪都唔係一個同我特別相熟嘅朋友，所謂Go With The Flow就係咁。」

對於這個「數字」問題，雖然Wyman表示一切隨緣，但提起又似乎樂此不疲，他續道：「我記得我第一千首嘅作品係一首陳奕迅嘅歌，如果一定要做牌，我會做第1500首，不過以我近年嘅產量，都唔知幾時先寫到啦。都可以講下嚟緊第1400首，其實排好咗應該係一首莫文蔚嘅歌，除非有突發事情出現啦。上一次寫莫文蔚嘅Solo歌已經係第100首左右嘅事，所以都隔咗千幾首，大概二十年前嘅事啦，我諗當中都有命運嘅意義啦。」

不知不覺，Wyman已踏入填詞界25年，2012年曾開過一次作品展，不少樂迷也相當回味，到底Wyman會否襯機再開一次作品展？他坦言：「呢一秒鐘你問我，我都仲係想開嘅，不過唔會係呢一兩年嘅事啦，可能要隔夠十年先去做。但去到嗰個時間點，個世界仲係咪適合畀我去做一件咁嘅事呢？其實好難講，世界變化得太快，上一次2012年開，當時嘅世界都同而家好唔同，如果再去到2022年嘅時候，我盡量希望可以做到。」