【自選Playlist】LMF五月開騷「震散」九展　Fans要聽歌溫書備戰

LMF是香港老牌樂隊，風格揉合Nu Metal、Hardcore Rap，亦推動了香港的Hip Hop文化，由1999年成立至今一樣咁躁，政治、社會、民生各種問題一樣夠膽用粗口「X！」問侯，其成員除了基本的MC仁、大飛、阿華、Kevin Boy等人之外，不少圈中名人如李璨琛、黃貫中、鄧一君等都合作過。雖然LMF於2003年宣佈解散，但之後都多次合體開騷，現身大大小小音樂節，並將於今年5月假九展Star Hall開騷，各位fans終於等到！

仲有兩個月就開騷，各位fans緊係要溫咗書先啦！以下Playlist就揀咗5首LMF代表作，如果係fans就要跟住唱，跟住「X」啦！

1.《大懶堂》

LMF作品咁躁當然要隨序漸進，搵首Chill啲、易入口啲嘅聽咗先！《大懶堂》面世已經18年，差唔多人人都識唱：「想我都好想好似中咗頭獎/有嘢唔使做/老細又吹我唔漲/日日等出糧/無乜嘢需要緊/就係咁嘅樣乜都唔使撈就至理想」

真係睇字都有聲，不過呢首歌淨係聽CD係唔夠喉，事關佢哋玩Live好多時都會請黃貫中出嚟彈結他Solo，一段表演睇晒兩個本地搖滾Icon，抵到爛啦！

2.《傲氣長存》

熱完身準備要跳喇！第一句「喂！係咪講幾句粗口就會教壞你個仔/又唔見我鬧幾鬧就可以改善社會問題」已經表明LMF嘅態度，唱粗口唔等如潑婦罵街，正因為有理據先可以咁理直氣壯。加上曲風是典型Nu Metal節奏，一響前奏就即刻令人進入狀態，學歌詞話齋「從今天起通通釋放自己/仍輸得起其實我地也置諸不理」。

3.《屋邨仔》

低下階層的家庭問題每日都發生，當中的原因千絲萬縷，但LMF十多年前寫下的社會問題，到今時今日仍然每日上演，實在可悲，不禁令人反思到底這香港社會有否進步過？

4.《揸緊中指》

《揸緊中指》可算是LMF「新歌」之一，但數數手指已經面世9年，亦是較以往作品「乾淨」；雖然粗口少，但不代表沒有態度，不代表回塘。雖然LMF各人經常笑言自己老，唱足一set唔夠氣，不過唔使驚，只要一起歌就算佢哋唔唱，台下一樣成首識背。

5.《愛是》

收錄於2002年專輯《嘻哈門》，原為鄭秀文主唱featuring LMF，但及後LMF都有以acoustic形式表演，實在要佩服主音阿華的功力，就連女Key都能應付，聲嘶力竭地唱「放棄的愛任意去傾倒　莫問愛是糊塗」，令聽眾有另一番感受。