【自選Playlist】5首歌應付拜年長輩問題　撐到尾《說再見了吧》

新正頭大年初一，相信大家都想拜年逗多啲利是，食緊唔肥開開心心。不過，去拜年總要面長輩「嚴苛」嘅問題，「有冇拍拖」、「讀咩大學」、「返緊咩工」、「人工幾多」、「幾時買樓」等等開場白年年都要「應付」。雖然你心諗「關你乜事」，但又不能宣之於口，唯有硬食。
既然要硬食，不如聽住歌面對啦。戴起headphone塞住對耳，無論長輩問咩都好，笑住點頭又一day。如果你面對以下情況，就試下聽呢5首歌逃避一下。

1.長輩開口埋口都係「錢」

相信大家最唔鍾意聽到嘅，就係下下都「錢錢聲」。後生仔多數都覺得，人生仲有好多事情值得關心，點解只係識得睇住個錢字呢。每次講親夢想，長輩就叫你「當興趣好喇」；見到你買樂器、相機，就同你講「儲錢買磚頭實際啲」。

呢個時候不妨聽一聽符家浚嘅《人生不是一份工》，淨係歌名已經代表晒你心裡千言萬語。加上曲風夠Chill旋律易入口，當你俾長輩問題搞到好「忟憎」，正好幫你平靜一下。

2.長輩打麻雀嘈過地盤打樁

長輩們最興講「發番個新年財」，打麻雀、魚蝦蟹、鋤大D呢啲新年賭局根本就係「指定動作」。老實講，圍埋打幾圈四方城，就算打一、兩蚊都開心嘅，都係志成班人笑下吹下水；不過唔係個個都鍾意咁嘈呢。

呢個時候不如就聽下Daft Punk嘅《Get Lucky》啦，延續一個夠Chill又Up Beat嘅感覺，對住班長輩跟住拍子點頭，咩都say YES就唔使煩。佢咩你聽緊咩你又可以同佢講「祝你Get Lucky羸多啲」，咁就啱晒佢哋心意啦。

3.喂，你拍拖/結婚未呀？

又嚟到一百萬嘅問題：「你拍拖/結婚未呢？」

老老實實，我有冇拖拍，同幾時儲到錢結婚，唔會因為你問多兩句就即刻變到出嚟，何必勾起我傷心事呢？長輩隨口一句言者無心，但對我哋呢啲小薯嚟講好大壓力㗎。

呢個時候就最啱聽野佬嘅《嫌小姐》喇！其實唔單止你聽，直頭可以俾埋長輩聽，依家要拍拖唔係咁易㗎。唔好再講廿年你哋點樣打個電話，拖下手仔就認定對方啦。依家2018年喇，你以前用「大哥大」電話，今時今日你都用小米啦。

4.考試考成點呀？讀咩大學呀？

絕對明嘅，長輩總係會講讀多啲書，做專業人士出人頭地，玩音樂、影相、做手作呢啲嘢擺埋一邊當興趣好喇。長輩上晒岸當然用佢哋舊時嘅「成功法則」向你說教啦，佢哋又唔明今時今日仲有其他出路，所以先話你不務正業。其實最緊要你知自己做緊咩就得啦，呢個時候就聽下RubberBand嘅《飛天》，學歌詞話齋：「一跳起去找那 一片天」。

5.終於散席喇！

應付完長輩一輪嘴難題，食下嘢唔覺唔覺又到散席時刻，終於可以鬆一口氣。真係除咗恭喜之外，都唔知應該講乜好；心水清嘅你都知道，下年同樣要面對呢時問題。點都好啦，逗完利是玩完B之後，就返屋企唔好諗咁多喇，有咩留番下年拜年講啦。呢個時候就聽Supper Moment嘅《說再見了吧》，結束「勞累」嘅一天，聽日年初二仲有第二場發問大會呀哈姆太朗。