【仙后餐廳】張敬軒教你聽真《缺》搵「彩蛋」　前奏向林憶蓮致敬

聽歌人人都會，無論返工返學、搭車行路，好多人都會戴耳機塞住對耳。不過，除咗最突出嘅人聲部份外，到底點先可以全面地聽一首歌呢？今時今日大家睇戲都鍾意睇「彩蛋」，務求捕捉每一個細節位；套用落歌曲上，點先聽得出當中嘅「彩蛋」呢？張敬軒就用新歌《缺》做例子話俾大家聽！
攝影：陳順禎

張敬軒早前推出新歌《缺》，邀請到殿堂級音樂人Mac Chew（周國儀）操刀編曲部份。《缺》前奏以鋼琴和弦樂揭開序幕，疏落的鋼琴旋律營造一種孤寂的感覺，張敬軒以呢喃的聲線處理Verse的部份，原來是為營造一個冰天雪地的氣氛，軒仔解釋：「其實一首歌嘅編曲好重要，首先佢奠定咗旋律嘅基調。《缺》入面Mac Chew用一個Minor（小調）和弦開始，前奏一起到我開口嘅第一句，已經有一個冰天雪地嘅氣氛。」難怪《缺》的MV要有下雪的場景，利用影像讓大家更明白歌曲意思。

軒仔之前接受訪問已經講過，新專輯會以向90年代致敬作主題；加上他對林憶蓮1996年專輯《感覺完美》情有獨鍾，所以才特意邀請Mac Chew出山，採用已塵封多年的Sampler（取樣器），去呈現一個90年代感覺的編曲。原來《缺》一曲的前奏已包含一個向90年代致敬的「彩蛋」，軒仔介紹：「林憶蓮於96年嘅一首主打歌《哭》，前奏所用嘅電鋼琴音色，同《缺》入面所用嘅電鋼琴係一樣，呢個係致敬嘅一種方法。」

《缺》當中另一個「彩蛋」就是軒仔的高音部份，他表示近年改變了錄音習慣，而且音高亦有所突破。軒仔表示：「另外一個『彩蛋』就係副歌部份嘅高音，呢幾年我都好少唱一啲好澎湃嘅高音。呢首歌最高音嘅地方一直係B flat同High C徘徊，都錄咗我一段時間。」

軒仔續說：「其實我呢幾年錄音習慣有啲改變，以前係唱一take又者幾take，揀比較好嘅一take，邊句唔好就補嗰句。但係近幾年開始，我着重Live嘅感覺，今次頭尾我錄咗三十幾take，呢個係第七個session最後一take。我覺得相對係感情、音色都比較充沛。」

要完整地理解一首歌，除了以樂理的角度出發，分析編曲，理解當中的和弦、樂器鋪排等等細節外，還可以了解歌手與音樂人錄音的過程及創作的靈感。軒仔之前接受訪問提過，在音樂事業上他已圓夢，令他一直堅持是因為一份使命感。軒仔覺得身為歌手就像一療癒師，希望能夠創作為聽眾療傷的歌曲。他形容《缺》一曲蘊含的力量比較強大，希望聽眾能夠到低谷找回自己；利用那些「缺口」轉化為「出口」，能夠重新站起來。