【萬千星輝】四葉草回憶潮再現　多才多藝譚永浩你又記唔記得？

《萬千星輝頒獎典禮》除了多笑料，還有不少感動時刻，令人憶起原來不少藝人的確伴著我們的青春成長。昨晚唐詩詠憑《不懂撒嬌的女人》奪得「最佳女主角」，淚灑當場，不過感動到喊嘅唔止佢，連帶電視前嘅唔少觀眾都喊晒口話：「我由《四葉草》睇佢睇到而家㗎啦！」的確，當年的青春劇《四葉草》系列是不少人心中的經典，更帶出了不少紅透半邊天的藝人。不過在頒獎禮以外，你對當中曾出現的其他角色又有否印象？又知不知道當中很多仍在等待機會的演員，其實擁有多才多藝的一面？

2004年憑《赤沙印記@四葉草.2》入行的譚永浩(Jarryd)，當年在《四葉草》中飾演陳自茵的男友，2010年更奪得「英皇新秀歌唱大賽2010」的冠軍。現時主打TVB的主持工作，其實心底仍有一個音樂夢。襯著年頭樂壇未興起風浪，Jarryd在網上發佈了一首翻唱自Bigbang太陽《Eyes Nose Lips》的《離開了的雙手》，把原曲重新編曲譜詞，成為一首帶有Cantopop風格的《Eyes Nose Lips》。

這首改編作品由Jarryd的好友Sanchez為他編曲監製，將全首歌改頭換面，製作一啲都唔馬虎。問到佢點解特登將一首幾年前嘅舊作改編，而唔重新唱一首新歌，Jarryd表示：「其實對呢首歌無特別情意結，不過我同呢位編曲嘅朋友Sanchez一路都有份熱血想做好自己一方面嘅事情。我就好想唱好啲歌，佢就好著迷於編曲監製嘅部份。而家呢個編曲其實佢一早已經諗好咗八成。」以住Jarryd也會靠自己處理好度橋、拍片、剪片等問題，就如之前與好拍檔盧峻峯、董敬文組成「喂霞姨」，所有事情也是自己一手一腳做好。今次製作相對大工程，與之前的小品製作有所分別，Jarryd亦感到有壓力：「最初mv rough cut出嚟。我見到成件事咁pro，無理由vocal嗰part比下去。於是我決定再錄過。但由於首歌好難唱，而且果段時間工作比較忙，少休息。喺把聲狀態唔好嘅情況下，我錄到發脾氣。記得錄第一段主歌既時候，把聲已經開始拆，當時心諗，而家先第一段，幾時先錄得完？感覺同完成嘅距離好似好遠。有一刻諗過放棄，不如用返個demo版算。不過Sanchez好有耐性，最後成功錄好左。」

堅持至今，譚永浩表示最近其實有一位前輩歌手對他影響很深：「早排睇吳浩康演唱會，佢話曾經以為自己距離個台好遠，但一步一步咁行，終有一日佢終會行返上去。佢經歷過咁大嘅低潮都可以行到去目的地，更加令我覺得今年自己要決心去發展唱歌嘅工作。」其實今次Jarryd製作的認真程度，並不比TVB旗下的星夢一眾歌手差。正當大家在昨夜頒獎禮上突然發現，單是星夢過去一年的劇集歌已足足有41首以上，但歌手來來去去也只是幾個的同時。或許我們都忽略了，其實不少唱得之人也潛藏在TVB中，等待一個發圍機會。