【萬千星輝】合唱環節彈琴竟然冇插線　譚嘉儀：唔會尷尬嘅

昨夜TVB的《萬千星輝頒獎典禮》成為全城熱話，由Mayanne攞獎感動時刻，講到陸永得罪叻哥，甚至係汪阿姐嘅「山頭文化」論，成個騷真係充滿Talking Point。不過除咗睇住一班藝員攞獎講感受之外，其實表演環節都相當精采，簡直好似係同觀眾玩緊「找錯處」嘅遊戲咁，估唔到一個電視節目都可以有咁強嘅互動環節。尤其喺間場嘅唱歌部份，一班藝員被指咪嘴唱歌都唔係咩新鮮事，更甚係有眼利嘅網友一眼睇穿，當王浩信、唐詩詠、黎諾懿、譚凱琪、袁文傑、張達倫、鄧佩儀、譚嘉儀上台合唱《陪著你走》嘅時候，負責邊彈琴邊唱歌嘅鄧佩儀同譚嘉儀部電子琴竟然一條線都冇插！

參考文章：【萬千星輝】成班藝員上台「咪嘴」？ 夾硬度唱歌位其實唔討好

其實有啲常識嘅人都會知道，電子琴唔插線又點駁amp、又點會有聲呢？兩部琴仲要隊到前一前，喺高清直播底下，電子琴嘅插孔可以話係一覽無遺。見到咁嘅狀況，就連網民都忍唔住戥兩位彈琴嘅小花唔抵：「佢哋又唔係唔識彈，TVB搞到佢哋好似扮彈咁！」

有見及此，《香港01》搵嚟譚嘉儀解話：「大會其實有好多嘢安排，佢哋都擔心臨場有啲咩錯失，所以佢哋都係想Keep到我哋表演嘅水準啫。」問到她事前知不知道原來電子琴冇插線，她表示：「都知道嘅，早幾日已經會講好。不過今次好多人大合唱，所以唔想影響到其他人嘅表現。」有留意譚嘉儀嘅朋友仔都會知道，其實佢一向都多才多藝，好多作品都係自己作曲作詞，其實彈琴又點會難到佢？今次喺台上被發現部琴冇插線，佢又會唔會覺得尷尬呢？嘉儀大方表示：「我表演得好開心呀！唔會尷尬嘅！我好Enjoy可以喺鏡頭面前表演呢首翻唱作品。其實呢首歌我一向都好熟，要彈一定彈到，不過時間倉促，工作人員有好多嘢要安排，製作好多嘢都好急，所以佢哋就唔想我哋太辛苦。」不過她對網民的細心也感到相當驚喜並笑言：「下次再有呢啲部份，我哋會記得插返條線㗎啦！盡量都希望可以真彈啦！」