【叱咤】希望有更多歌手受到重視　陳柏宇：佢哋只係爭一個機會

一向被視為「隱世歌手」的陳柏宇，今年可謂豐收之年，開完紅館騷，昨晚於叱咤更得到「我最喜愛的男歌手」，終於得到大家的肯定。在台上Jason除了講愛妻宣言，亦叫廣大樂迷下年可以投票給其他歌手，因為他希望其他歌手都可以感受到站在頒獎台上的喜悅。

陳柏宇在叱咤慶功宴接受訪問時提到，希望可以透過歌手的身份去幫助他人，他更謙稱自己不是實力派歌手：「我其實想表達嘅唔只係事業上嘅事情，其實我訂立咗自己嘅目標，我又唔係一個實力派，又唔係偶像派，我好想透過歌手呢個事業，呢一行俾我到我嘅嘢，可以真真正正幫到人。」他補充：「講緊嘅幫人唔係話要起學校，或者特別照顧邊類人，而係單獨去認識每一個人，幫佢哋解決問題。」

陳柏宇又提到樂壇其實有很多值得被重視的歌手，他表示：「喺我眼中有好多我好喜愛嘅歌手，一啲性格好、音樂好、唱功好嘅歌手，永遠都得唔到喺我心目中佢哋應該有嘅回報。」他續說：「尤其係07年出道嘅歌手，有句說話講得啱，能夠喺呢一行發展一個長嘅時間，年尾頒獎禮點樣得唔同認同都好，佢哋都一樣係有存在價值。而呢班人有存在價值，係因為佢哋人品好，音樂好，只係爭咁一個機會啫！希望同我同期出道嘅人都感受到呢份喜悅！」

陳柏宇又透露，希望今可以修讀社工：「其實我細個開始就想做社工，喺多倫多讀書都係讀社工，最簡單嘅原因就係我想幫人。因為我個人偏向懂得欣賞事物，又識得氹自己開心，但我知道唔係人人都係咁，我好想感染到其他人都有呢個諗法。唔使靠一啲虛無嘅成就，或者一啲其他人嘅肯定，其實自己對自己嘅肯定先係最重要。(會否有一個特定群組想優先幫忙？)我唔會將人去分類，每個人都有佢自己嘅問題，唔開心嘅時，有各自嘅故事。」