【新城勁爆】十二樂勢力不如摺咗佢啦　歌手靠自己一樣彈得起！

一年一度的新城勁爆頒獎禮昨晚舉行，以往大家最深刻都是新城「分豬肉」，一次過頒過百個獎項；至上屆開始「改革」，將獎項頒發數量銳減一半，並增設「新城十二樂勢力」，表示將會力捧得獎的十二位歌手，但「力捧」這個字實在令人搲頭。

去年入選「新城十二樂勢力」的歌手有：MastaMic、胡鴻鈞、吳業坤、林欣彤、鄭世豪、王梓軒、衛詩、方皓玟、糖妹、何雁詩、符致逸及石詠莉。

但到底有幾力捧呢？唔講遠講近，今年新城頒獎禮中，上述去年被視作「力捧」對象的歌手，只得坤哥及石詠莉得獎；但留意番，石詠莉係冧莊「十二樂勢力」。咁其他歌手去晒邊呢？仲要一個獎都冇。

再講，坤哥上年得獎之前已經開紅館騷；胡鴻鈞今年爆紅全靠TVB劇《降魔的》石敢當的角色，不需新城「力捧」已經靠自己大放異彩。

但其他歌手卻相對顯得尷尬，Mastamic今年除了《16 HK Rap Up》及《Backseat Love》便沒有其他作品，演出亦較少，勢頭較3年前《流行反擊戰》時遜色。何雁詩因近期的緋聞形象插水，即使唱過《不懂撒嬌的女人》主題曲也無力挽回。糖妹、王梓軒、鄭世豪現時主要都是專注TVB的幕前演出；而方皓玟向來都被視為樂壇的「黑馬」，但竟今年在新城沒有歌上榜。

看到以上資料實在令人一再搲頭，新城力捧？

再看看今年入選「十二樂勢力」名單：Fabel、羅啟聰、JUDE、葉巧琳、布志綸、J. Arie、許靖韻、鄧小巧、陳明憙、ReVe、Merry Lamb Lamb、石詠莉。各人都開始嶄露頭角，如許靖韻早前憑「小背心」打出名氣，布志綸為樂隊Mr.的主音本身都有大的fan base，鄧小巧、J.Arie等人唱功紮實不容置疑，Fabel一直堅持走電子風格都開始為人認識，他們的實力有目共睹，而且樂壇亦開始提供空間讓他們發展。

新城去「力捧」他們，到底有幾大力？難道像叱咤一樣舉辦拉闊演唱會，但牙力及叫座力又欠奉，實在令人摸不着頭腦如何「力捧」。去力捧他人之前，不如花心思改善自己形象來得實際得多。

再咁落去，新城「十二樂勢力」不如摺咗佢啦！